#ParentLicenses2581

當時為放工時間，於觀塘地鐵站排隊乘搭扶手電梯時，突有位穿黑衫嘅老母唔跟人龍排隊，打斜行，然後推個女喺人龍之中攝位，攝正喺我前面

由於平時我一定同前面嘅人保持一個適量嘅距離，同埋會預留一格梯級嘅空間，而個老母就充分利用痴實佢個女呢點，成功地強行攝位喺我前方，所以本身預留嘅一格梯級空間就冇咗

未幾，乘搭扶手電梯落到達地面之際，嗰兩母女好似磁石咁痴住個地下，既唔郁唔行向前，又唔知做乜；但因為電梯依然向前運行緊，我為免撞上個老母，當機立斷，立即打斜向前行避開佢哋，望都冇望過佢哋搞乜夠膽喺電梯位度唔郁

隨即個老母就惡人先告狀，鬧我整到佢隻手，我鬧返佢本身冇排隊在先，跟住佢就講晒粗口潑婦罵街。其實佢話我整到佢，根本就無證無據，但佢兩母女打尖就鐵一般嘅事實

我朋友本身企喺閘口等緊我，話唔知原來係我同佢鬧緊，只係以為有個好嘈嘅精神病患者喺度發癲

第一、身為人母，利用自己個女去打尖唔排隊，厚顏無恥；第二、停喺電梯位度唔郁，係好易令後面嘅人「炒車」，無腦就唔好學人生仔；第三、惡人先告狀——其實你唔攝位，本身大家保持距離，咪冇機會整到你囉，公主！第四、拖住個女都夠膽講粗口，第時個女又打尖又講粗口，實大把人爭住要啦！

社會垃圾製造未來社會垃圾

讀者投稿@普通上班族