#ParentLicenses2302

暑假時，我帶咗十一歲和十五歲兒子去科學館。由於當日下大雨，館內特別多人，目測有八九成是強國人

進去不久，可能因為我十五歲兒子已經有成年人的高度，排隊時有兒童當佢係成年人，完全無視他在排隊（以為只是陪玩），所以就直接打尖。我仔一來不想嘈，二來望落自己大佢好多年，無謂「以大蝦細」咁，遂沒跟他計較，只是有點無癮地行去第二度

直至我們到達地庫廣受歡迎的「模擬駕駛區」，就接二連三地出現關於排隊的煩惱

情景一：

當日我仔自己排隊，我在圍欄外陪他。突然有一個約十歲的強國小孩A，跑來就走到前面，與兩個較大的青年人會合

我就對小孩A說：「請你排隊，全部人都在排」

兩個青年人就用國語回覆說：「他跟我們一起的」

我忍耐著說：「新來也是要排隊啊，如果再插多十個八個，對後面的人不公平」

當時他們也沒吵鬧及堅持，小孩A就離開了

情景二：

幾分鐘後，有位家長排在第一位，小朋友B在前面直接跑去龍頭（不確定他是剛玩完，再立即走來玩多次，還是只是玩第一次，但爸爸代排）。

當時我問負責的保安員：「為何小孩B可以直接去前面？」

保安說：「有家長在」

由於未能證實他有沒有連續重覆玩，惟自己好警惕咁睇住環境

玩個遊戲都要咁，心好累，但事情還未完結

情景三：

又幾分鐘後，有個約七八歲的男孩C，從側面跑去前面，瓹過圍欄，走去近龍頭位置去「會合」佢爸爸

我又要出聲了：「喂，要排隊啊！」

在我身旁（圍欄外）疑似媽媽就說：「他爸爸在排啊！」

我：「要排隊啊，又代排！」

當我快要為接二連三的這些小事動氣之際，幸而有位正義之士出現了！

情景四：

有位排我仔後面，帶著約十歲兒子的男士主動問我：「佢地係咪打尖？」

我說：「他們說是爸爸代排喎」

他說：「可以咁㗎咩？」

我說：「頭先（情景二）保安都無理啦」

這位爸爸就大聲問保安：「阿叔，係咪可以玩完一次，再即刻玩先？咁我排到龍頭，俾我仔自己玩。佢玩完，返嚟搵我，我再俾佢玩囉！我玩夠三次先走！」

保安有點委屈，說每人都是玩一次

這位爸爸咬住唔放：「我唔理呀，好多人都係咁！」

保安無力回應，只能默不出聲

這位爸爸再對保安說：「你搵你上頭落嚟啦！咁多國內人，你們要搞好啲秩序！」

這位爸爸一路排隊，就繼續大聲講「自己要連續玩幾次」云云，而旁邊各人就突然明顯地比較守規矩了

這位爸爸不斷堅持，這刻感到保安也有點受氣。因人手唔夠，其實他也好難獨力應付

接著，有兩個上頭嚟到，正義爸爸隨即反映事件，亦即時多了人手協助

這事到此快要完結，因著正義爸爸的「咄咄迫人」，我還在替保安覺得有點難過時，事情發展峰迴路轉

到正義爸爸排第一位時，對站在旁邊的保安說：「我都係諗住陪個仔玩一次啫。不過我唔咁講，唔叫你們上頭嚟，混亂場面係唔會完」

然後他對著兒子說：「一陣我陪你玩，如果你想再玩，爸爸陪你由頭再排一次！」

我回想這事，好似好小事，但好感動。一來這位爸爸仗義幫忙，當時不少人不守秩序，雖然他們對我們不是大吵大鬧，但難免勢孤力弱。他的仗言是對堅持做正確事的人來說是一個好強大的支持，反映我們互相幫忙的重要性💪；二來其實他也是合理的人，看似難為保安，也在最後禮貌地表達清楚，前線不是獨力受氣；三來也是最重要的，他身體力行要守規矩，也清楚解釋給兒子聽

祝福這位爸爸一家，他所教導這些重要的社會價值觀，必定要傳承下去！

讀者投稿@正義爸爸fans