#ParentLicenses2441

同學仔生日，佢家長幫佢開生日會，撞正流感高峰期

佢邀請嘅二十人入面，有五個小朋友（包括我哋）都中咗流感，學都冇返，更加唔會去生日會，因為一齊玩，又一齊大食會，對其他人嚟講都唔係咁好

因為真係唔想傳染俾其他人，我係第一個喺個群組度講，我哋話小朋友病咗，所以未能出席，預早祝佢生日快樂。另外，我再有同佢講，我哋有預備禮物，之後帶返學校送俾小朋友。後來，陸續都有幾個家長都話小朋友病咗而唔去

派對結束後，壽星仔嘅媽媽喺個群組度@我，話我甩底，搞到其他人有樣學樣，又話睇我ig見到小朋友好精神，搞到佢個仔生日得好少人出席，場面好冷清，蛋糕、到會又食唔晒云云

我都係再次解釋話唔想傳染俾其他人，再解釋話真心且無心甩底，如果有心唔去，又點會一早買好禮物呢

到底呢啲家長諗乜，即使我小朋友係精神尚可，但唔代表冇傳染性，我只係唔想傳染其他人。我知病咗照返學，照出去玩嘅大有人在，我哋自律反而唔會appreciate？

當然我明白生日會未如預期地熱鬧可能會失望，但為咗生日會，就算冒住風險都願意？同埋人哋病咗，唔係應該叫人保重多休息嗎？我真心無奈

讀者投稿@良心老母