#ParentLicenses2439

唔好意思呀，故事打得有啲長，但係交代清楚來龍去脈會比較容易理解，希望大家唔好介意

話說老公同前妻有一個仔（下稱Ａ君），現年十六歲，自細由婆婆照顧。Ａ君中三時重讀咗一年，而家已經輟學。兩夫婦喺Ａ君大約10歲左右分開咗，佢跟媽媽。離婚時，女方聲稱Ａ君係佢嘅命根，無論如何都要攞到撫養權，所以男方冇同佢爭。後來，男方同我（即現在我老公）組織咗新家庭，亦都有自己嘅仔仔

我哋早兩年先知道，喺Ａ君十歲嘅時候，女方帶咗佢去做評估，發現佢有ADHD同埋專注力不足，但係媽媽拒絕醫生開藥俾Ａ君食，亦都冇再同佢去覆診。其實Ａ君由讀幼稚園開始就有行為問題，會控制唔到自己情緒、極衝動，就算到高小年紀都仍然會因為唔合心意而發癲𦧲地，又會上堂發脾氣推枱推櫈，經常收到老師投訴

我唔知道兩位家長當時點樣處理Ａ君嘅行為問題，只知道爸爸同埋婆婆都非常溺愛Ａ君，只要Ａ君扭計或者大吵大鬧就咩都俾；而媽媽就好惡，日日都鬧到個仔飛起，就算Ａ君乖乖坐定定做功課，都要喺隔離鬧先安樂，甚至試過鬧到Ａ君要入廚房摷刀

Ａ君由細到大多數時間都係跟住婆婆，但係婆婆因為要出去打麻將，所以由得高小年紀嘅佢自己落街玩，喺球場流連。爸爸有同媽媽嘈過話唔可以咁樣放縱Ａ君，但係媽媽堅持冇問題，更加鬧爸爸歧視同睇唔起佢女家。後來Ａ君升中之後，更加會喺球場玩到三更半夜都唔返屋企，又會經常去朋友屋企過夜。Ａ君亦都自從高小起有偷錢習慣

自從父母離異之後，Ａ君同爸爸關係都好疏離，因為媽媽教佢要錢就搵爸爸，見面基本上只係為咗攞錢同買嘢。由於媽媽不停向佢灌輸爸爸係衰人、爸爸冇養過佢、爸爸害到媽媽好慘等等，佢變到對爸爸好有敵意（呢啲都係我後來認識Ａ君之後聽佢講的）

Ａ君升中後情況就更差。中一學期尾家長日，佢喺學校當眾打媽媽，俾學校轉介咗去寄宿學校讀中二。雖然佢可以返去原本嗰間學校升中三，但係爸爸同婆婆幾乎每日都收到老師投訴，學期尾老師更加勸佢退學。結果爸爸向學校求情，最後可以重讀中三，不過喺重讀呢一年間，Ａ君基本上冇返過學。就係咁，佢喺十五歲呢一年就輟學

喺第一年讀中三開學嗰陣，Ａ君開始間唔中作故仔扼爸爸俾錢佢、偷婆婆啲錢等等，夾夾埋埋差唔多到五位數，後尾我哋發現佢係用啲錢嚟還賭債

大家有冇發現喺「家長日打媽媽事件」之後，媽媽已經冇再喺文中出現？

早兩年幾，Ａ君十四歲生日前一個月，亦即係佢喺第一年讀中三上學期嗰陣，有一晚爸爸收到佢媽媽喊住打嚟，就話Ａ君俾警察拉咗，求爸爸救吓佢，原來Ａ君衰「幫人送包裹」。我哋搵埋律師去警署，再搞好晒保釋之後，我認識咗呢位媽媽，亦都keep住會見Ａ君

後來嗰兩個月，媽媽每個星期都會帶埋Ａ君嚟同我哋一家三口飲茶。Ａ君好錫同父異母嘅弟弟，同我感情都唔錯，會傾啲連佢父母都冇聽過嘅心事。我同Ａ君相處嘅時候，其實冇見過佢父母口中嘅行為問題，只係佢啲生活習慣、待人處事態度，令我覺得十幾年嚟從來冇人管教過佢

喺呢一段時間，我基本上每一日都會同媽媽經WhatsApp溝通，有時會講Ａ君情況，而更多時候係閒聊。就喺大家都見到Ａ君情緒同行為都有啲進步嘅時候，即係事發後兩個月，媽媽突然間話要離開香港一個月，要飛去某國搞移民。媽媽聲稱已經安排好晒，搞埋最後嘅手續就會帶埋Ａ君過去讀書。我同我老公都唔太相信，因為呢個地方冇咁容易成功移民，而且手續上亦都唔需要飛過去處理

我哋都冇佢辨法，只係勸佢Ａ君而家重等緊上庭，好需要佢睇住，而且隨時會因COVID爆到九彩而封關返唔到嚟，請佢唔好喺呢個時候走咗去。當然佢冇聽，交低咗Ａ君跟婆婆住就出發。佢應承一定會喺Ａ君第一次上法庭之前返嚟

點知，喺佢上飛機嗰朝拎咗一大堆文件嚟搵我，當中包括一份授權書，只係簽低咗個名，授權「任何人」去處理Ａ君嘅嘢（人名位署名留空咗），佢拜托我幫忙照顧Ａ君。當下我心感不妙，但係佢大人大姐，勸又勸咗咁多次，我都阻唔到佢上機

結果，Ａ君喺媽媽走咗之後變本加厲，除咗上文講到日日俾老師投訴、欠賭債之外，更加因為不同原因再俾警察拉多兩次，又繼續偷屋企錢，更郁手打婆婆，激到婆婆要入醫院

時至今日，媽媽已經離開咗香港兩年有多。開頭我每日都有同佢溝通，一個月限期將到，佢話佢返唔到嚟，一時話重未搞掂啲文件，一時又話要見工，一時又話要見律師，拖吓拖吓到香港因為covid封關，更加大條道理唔使返嚟

到解封嗰陣，我打去問媽媽幾時返，勸佢喺Ａ君身邊陪住會好啲。佢發爛渣話佢有佢嘅人生，佢返嚟都幫唔到個仔，重叫我哋受吓佢平時有幾慘。我忍唔住鬧佢，跟住佢就消失咗

我知道直到而家媽媽都仍然有保持住同婆婆聯絡，佢一直都同婆婆講好快搞掂移民，好快可以接Ａ君過去，每次都係咁講，講足兩年

老實講，我覺得Ａ君真係好慘。除咗媽媽走佬，爸爸亦都做得好差，佢一直都逃避管教，唔識保護Ａ君，亦都冇學習好好同Ａ君溝通。雖然我錫Ａ君，我哋感情的確唔錯，不過佢都大個仔有自己圈子，所以我哋都唔係經常會見面。始終我都唔係佢親生媽媽，而且佢媽媽健在，好多嘢我想幫都好難做得太多。我可以做嘅只有提點爸爸點樣溝通得好啲，點樣慢慢引導佢而已

好彩嘅係，Ａ君輟學耍廢一年之後，突然間醒悟，正正經經去做學徒，勤力返工。最近同佢食飯傾計，覺得佢成熟咗好多，明顯同之前唔同咗。我只希望佢可以過返正常生活，唔好再群埋壞朋友。我相信佢應該好介意媽媽走咗去，問起媽媽嘅事佢會冇晒表情唔想答

我真係從來冇諗過，世界上竟然有人可以忍心掉低自己親生骨肉去「尋找新生活」，到底有咩緊要得過自己十月懷胎、眠乾睡濕湊大嘅小朋友？點解會有咁自私嘅人？

讀者投稿@Emily