#ParentLicenses2272

為咗避免搭飛機遇到好多小朋友，我一向都唔會假期飛

唔知係咪太耐冇出國，竟見到好多家長會請假同小朋友去旅行。當日班航機前後三行加埋有八個小朋友，嘈到以為自己去咗迪士尼樂園。小朋友嘅踢櫈同尖叫已經無敵難頂，我都覺得已經好誇張下，點知我遇到更特別嘅

有次我聽到發聲玩具聲，向後一望，係一個點睇都似初小學生嘅小朋友拎住個發聲玩具玩緊。媽媽曾經阻止小朋友再玩，不過當小朋友冇得玩發聲玩具，就輪到佢不斷發聲，大吵大鬧，嘈到我叫媽媽俾返佢玩，因為最少發聲玩具嘅聲量冇小朋友咁嘈

爸爸媽媽都郁嚟郁去，拎呢樣拎嗰樣都算，次次都大大力咁開關枱面板，即使相隔三個位嘅我都感受到嗰種震動。最後爸爸前邊嘅男乘客忍唔住開佢火，都只係收斂咗少少

喺準備降落嗰時，我先發現原來佢哋重有個手抱BB。BB居然係全家最安靜最唔滋擾他人嘅一個，真係估佢唔到

我真係唔會仇視個小朋友㗎，因為坐咁耐機佢哋都悶同唔舒服嘅，不過帶有發聲玩具上機俾個初小學生玩嘅父母，我心入面就親切地「問候」過佢哋

另一次係芬蘭返香港，有小朋友係放聲大唱Frozen主題曲。爸爸有嘗試阻止但阻止唔到，好彩佢眼訓，起飛無耐已經瞓咗，我先有覺好瞓咋

讀者投稿@搭飛機最怕嘈