#ParentLicenses2334

每日返工返學時間搭巴士，車廂內實多人

我逢星期一至五都搭係同一班巴士，分別喺兩個中途站，都有兩個家庭上車。一個家庭有公公、高小孫女同埋低小孫仔，而另一個家庭就有老母同埋高小姊弟

呢兩個家庭嘅長輩一上車後都係不約而同地喺度大大聲安排座位：「快啲坐落去啦！俾人坐咗啦！」「坐呢度啦！」「行快啲啦俾人坐晒啦！」

當車廂內冇位時，佢哋都會講：「俾人坐晒啦！冇得坐㗎啦！」

直到有人落車，佢哋就會拎書包霸住個位，向車頭車尾冇位坐嗰個大叫道：「有位啊！你快啲行過嚟啦！唔坐又俾人坐咗啦！」

有一次孭住書包行唔切過嚟，空位俾人坐咗後，就會喺度吱吱摺摺

而家嗰兩對姊弟都會大大聲講嘢，孭住書包就撞開啲人搶位坐

好心你哋咁想坐，你咪喺總站搭過嚟囉，日日喺度嘈為咩

讀者投稿@老奉有得坐嘅咩