#ParentLicenses2264

喺暑假期間，我帶兩個小朋友去睇《蠟筆小新》電影

我哋去嘅係細戲院嚟嘅，全院入場睇戲嘅人有大概二十個左右。當時我就同我兩個小朋友坐喺如圖中嘅紅色位置

剛開場時，有兩個媽媽帶住六個小朋友入嚟（兩男兩女嘅小學生，另外兩個分別係兩歲零同四歲零嘅小朋友）。佢哋一行八人分開坐，分別坐喺圖中嘅綠色位置。我哋隔籬嗰四個位係小學生自己坐，而兩個媽媽就同兩個細啲嘅小朋友坐喺我哋後面

佢哋坐低無耐後，兩個細嘅小朋友就已經落地衝去搵姐姐（姐姐坐喺我小朋友隔籬）。兩個媽媽完全無諗住叫佢哋坐返低，係由得佢兩個小朋友行嚟行去。小朋友們搵到姐姐後就企咗喺我小朋友同姐姐張櫈後面，攝隻手喺櫈中間係咁整姐姐

過咗五分鐘左右，家長先行過嚟捉返佢哋坐低，期間我不停回頭望嗰兩個媽媽，佢哋完全無反應

再過咗一陣，個四歲零嘅女仔就開始玩佢嘅玩具。佢玩嘅玩具係好似水管咁，可以拉長縮短嗰款，一拉長係有聲嘅。佢拉咗好幾下，個阿媽都無叫佢收返埋，之後佢哋重調埋位坐喺我隔離，隔咗條樓梯位嗰四個位度坐

個四歲幾女童媽媽完全無諗過叫佢女坐定定，只係間唔中用佢隻手打佢幾下，示意下咁款而已

雖然我小朋友都會講下嘢，但我都會叫佢盡量細聲啲，唔好騷擾人。見到佢哋咁嘅情況，本人真係有少少建議：如果你小朋友係唔能夠坐定定睇戲，建議唔好帶佢去睇戲，或者就係買啲佢鐘意食嘅嘢俾佢坐定定食，再唔係就請你帶佢離開，唔好俾佢喺戲院度騷擾想睇戲嘅人

圖片來源@睛天pigpig
讀者投稿@睛天pigpig