#ParentLicenses2265

我以前係喺大學度做行政嘅，呢幾年因為疫情，對少咗啲內地學生。我唔係話內地生唔好，而係通常帶家長返學嘅都係內地碩士生。以下簡單交代兩個個案

個案一：個學生唔返學或者冇交功課
我哋會收到啲教授電郵，因為有關呢類問題教授會加我哋喺個c.c. list度。有家長用電郵問拎教授電話號碼，而佢哋通常都會留咗我哋office電話俾佢哋嘅

我哋接線嘅同事試過被問侯屋企人——早幾年啲家長好鐘意話自己係打長途電話嚟乜乜，當我哋轉唔切條線俾個教授，又或者個教授（扮）唔喺房，我哋冇得轉條線走，就會被人問侯「做咩要求個學生交功課」嗰啲。通常都係鬧我哋太多功課，又或者係啲死線set咗喺內地假期，更甚係有一次就問我哋啲老師要收幾多禮

好彩呢幾年佢哋鐘意叫個學生俾教授嘅微訊賬號嗰啲，我哋收少咗好多呢類電話

個案二：學生唔返學或者唔記得嚟考試
通常都會係透過電郵請假嘅，有啲教授會將我哋加落電郵 c.c. list度先覆啲學生，目的係預警我哋可能要提供支援

我哋間唔中都會見證同一個學生死完嫲嫲爺爺再死公公婆婆——其實有啲學生兩年內死幾次嫲嫲爺爺公公婆婆老豆老母我哋都見慣晒，如果佢哋唔係喺畢業典禮前問我哋同事可唔可以安排到多啲飛俾佢哋「死而復生」嘅親人，我哋都唔會確認到佢哋堅講大話嘅

又咁講，發展到而家有啲department要求學生交死亡證嗰啲，我自己就好反感嘅

我哋院校每年三四月都會提早租袍俾學生喺正式畢業前影吓畢業相嘅，好多年前見到一個學生XX同父母喺我哋辦公室門口影相。識做嘅我哋緊係叫埋教授A過嚟同個學生影相，等佢禮貌「問侯」吓佢啲屋企人，等教授A勸佢哋三個節哀嗰啲

點知同學嘅父母不但絲毫唔尷尬，重話我哋咒啲老人家死，話要搵公安拉我哋云云。同學XX呢刻以為自己影緊畢業相大晒（嗱，租袍影相唔代表畢到業㗎吓），佢即時企喺父母嗰邊一齊鬧教授A

教授A當時一句聲都冇出，由得佢哋三個一齊鬧。等三個都鬧完之後，簡單講咗一句「不好意思，我想是我誤會了這位學生是經常沒有來上課的XX」華麗轉身走開，同時我哋成班行政同事都即刻散晒

食晒以上嘅花生之後，我哋第二朝被指示收集返呢個學生嘅電郵，一次過交晒上去俾教授A同其他教授開會用。不出所料，開會結果係以行政程序將呢位學生以「死咗親人」為藉口而遲交功課嘅科目全部改過啲grade

學生XX喺呢段期間亦有繼續以電郵話屋企有事乜乜而冇再返學，即使臨近喺完學期前，佢仍然繼續冇交齊功課，所以我哋繼續見到教授A啲提示電郵

呢個學生最後肥咗一科咁大把，但因為佢約咗教授A見面傾「延遲畢業」甩咗底，嗰張需要教授A簽名嘅「延遲畢業」表格係冇喺我個位度出現過嘅。因為肥咗一科畢唔到業，又冇交到表格，學校系統直接當咗佢自動退學。盡責嘅我哋當然有用電郵形式繼續嘗試聯絡學生XX，但佢一直都冇覆過我哋嘅

然而，最神奇嘅係隔咗幾個月之後，我哋office收到同校另一個部門Y轉寄嘅電郵，內容係一間外國院校對於呢個XX嘅查詢，原來XX喺申請入讀呢間外國院校博士學位時，寫咗喺我哋呢度碩士畢業

我哋學校嘅部門Y係負責出證書同學分紀錄嘅，當然佢哋會話核對唔到個畢業紀錄啦，呢個學生都冇畢到業，得自動退學紀錄咋！

盡責嘅我哋緊係跟進返呢個查詢電郵，再c.c.返俾教授A一齊跟進。喺個電郵鏈度，我哋發現學生XX應該寫咗教授A個名做推薦人，但教授從來都冇寫過呢個學生嘅推薦信（封推薦信係點嚟㗎呢？係咪求其自己開個電郵地址扮係教授A呢？），教授佢就將我哋部門內部討論呢個學生嘅會議紀錄一嘢email咗過去，對方最後話會red flag呢個學生喺未來嘅所有申請

食花生嘅我哋繼續相安無事，office同事之間有吹過吓到底幾時先會收到嗰對父母嘅電話，但又冇?

又隔咗幾個月，Y部門同事話收到呢個自稱係呢個學生XX父母嘅長途電話，鬧佢哋做咩整唔見個仔啲學歷紀錄，搞到佢哋三個飛咗去外國，先發現間外國大學冇收到佢哋個仔。最可惜嘅係我哋冇得喺接線電話現場食埋呢粒花生，關心老人家嘅我，就問返Y部門同事知唔知啲老人家死而復生咗未

圖片來源@回魂夜
文章來源@人哋走咗寶嘅新抱