#ParentLicenses1431

我職業揸巴士嘅

話說喺早兩日，揸到返總站，我起身執嘢準備落車。上層有貌似一家三口嘅家庭慢慢行落嚟

佢哋一落到嚟，個目測大約7-8歲嘅小朋友望一望我之後好大聲講咗句：「哦！唔怪之得揸咁慢啦，原來女司機！」

個媽咪態度仿似好想話俾我知唔關佢事嘅咁，就好敷衍同個仔講句：「嘩，邊個教你講㗎！？」

個媽咪講嘅時候帶有少少輕佻嘅語氣，我完全聽唔出呢句說話有怪責嘅意思

我心諗：「其實我明白而家資訊好發達，又真係未必係你教，但佢做咗，你又唔即時教，其實之後都會係咁冇禮貌」

雖然覺得個小朋友幾冇家教，但其實我更想同佢講：「唔係我揸得慢，係架車快唔到。咁叻不如你揸，但你又冇牌😂」

禮貌真係好重要，請大家做父母就教好小朋友有禮貌，唔該晒

圖片來源@頭文字D
讀者投稿@SS