#ParentLicenses2035

我去咗間台式餐廳食飯，當時隔籬枱坐咗一個大概7, 8歲嘅妹妹同埋佢媽媽

突然有另外一台食客唔小心倒瀉咗嘢，個妹妹就好大聲咁講：「倒瀉嘢哈哈哈哈哈哈哈」

我心裏面諗呢個小屁孩都幾冇家教，而佢媽媽都係冇出聲，自顧自喺度食嘢、玩手機

過咗冇耐呢個妹妹喺張櫈上面郁嚟郁去、跳嚟跳去，重要撞到我，所以我同佢講：「妹妹，你唔好跳嚟跳去，呢度有火鍋唔……」（自問個語氣係西嘅）

喺呢個時候就被佢媽媽打斷我嘅說話，然後同我講：「關你咩事啫！小朋友係咁㗎啦」

我同佢講：「喺餐廳食飯坐定定係常識吧，依度又有火鍋又有鐵板咁危險」

佢媽媽可能感到蒙羞，只係再重複一句：「細路仔係咁㗎啦！」

及後就一直?住我，再好惡咁鬧佢個女：「你睇吓你吖，搞到而家俾人鬧啦」

因為個大人都係西嘅，我都唔想同佢爭辯落去，無奈要喺個氣氛都唔係咁好嘅情況下食完餐飯我就走咗

其實我覺得錯不在小朋友，個家長先係最大問題。個家長喺成餐飯期間都冇理過個小朋友，估計應該平時都係唔理佢，咁小朋友缺乏關注下會郁嚟郁去自娛係一個好正常嘅行為

然而，喺出現咗一啲影響到人哋嘅行為又唔去矯正佢，人哋出聲嘅時候又會覺得蒙羞，然後遷怒返喺人哋同埋自己個女身上，我就真係戥個小朋友慘

讀者投稿@巴比倫大淫婦