#ParentLicenses2000

Messy play「導師」考咗牌，但係佢「生仔」未考牌

我哋幾個媽媽約埋一齊去一間workshop度參加主題messy play。個workshop 係租一間瑜珈教室做，導師係一個媽媽，佢先生會幫手執頭執尾，而佢工人姐姐會幫手清潔messy play嘅玩具，當中佢一個約3歲嘅仔仔亦都在場

當時就係一班8-9個月嘅BB一齊上堂，初初發現導師嘅3歲仔仔都會一齊玩其實都冇乜野。然而啱啱開始冇耐，佢仔仔就開始打其他BB

形容為「打」呢個行為，因為佢仔仔唔係玩得太興奮而唔小心嗰種，係特登走埋嚟一巴打落BB個頭度，甚至會瞄準落BB隻眼度，搞到在場幾個BB都爆喊

因為過程發生得太快，佢又出手太快，我哋幾個媽媽反應唔切之下就搞到BB硬食咗一嘢，唯有自己帶走BB去其他sensory bin度玩

落堂之後，我哋幾個傾偈先發現，原來一班總共5個BB，佢個仔都打咗4個🫠。我哋幾個BB被打嘅共通點就係佢仔若無其事咁坐埋隔離，然後冇喇喇就出手打BB 🫠

另外，我哋留意到嘅係，仔仔根本未準備好同咁多BB相處，佢亦唔想自己媽媽嘅注意力去咗其他小朋友度，估計佢好呷醋，所以佢出手打啲BB。而且佢仔仔只係對住BB先係咁有「惡意」，對住其他大人就好熱情又有禮貌，所以我哋亦都相信佢仔仔都唔想陪佢教班

當時個導師（即仔仔嘅媽媽）同埋佢老公都知道同見到自己仔仔打其他BB，佢哋係冇處理到，亦都冇即時同人哋媽咪say sorry，更加冇話返俾佢仔知唔可以打BB，只係問個仔：「你係咪肚餓所以扭計啊?」

我😑，其實佢仔重覺得打BB係好好玩……

可能導師自己純粹覺得小朋友係打打鬧鬧而已，但實情係佢個仔因為呷醋而打其他BB，而唔係小朋友之間嘅爭執。佢做messy play幼兒教育，然而佢完全察覺唔到佢仔點解會有行為問題

直到我哋幾個媽媽同佢反映後，佢先出IG post話道歉，不過之後又出post話佢係用蒙特梭利式混齡教學。蒙特梭利真係死咗都彈起身，竟然咁樣俾人擺上枱

其後佢亦都有講佢仔打人嘅問題有改善，而家有大哥哥風範。即係咁，我哋俾錢你為嘅係上堂，唔係嚟陪你個仔玩、俾你個仔打、用嚟訓練你個仔囉

呢位導師完全唔尊重其他媽媽，更唔尊重幼教呢個職業。更令人氣憤係要經我哋一反映，佢就先出post，就好似出post先者道理就喺佢嗰邊咁🙄

相信都冇人會想自己小朋友冇啦啦被打，已經知道有媽媽驚咗佢仔想退款取消，但佢唔俾refund

我誠心建議呢位導師唔好意見接受，態度照舊，錢又照收；請搞掂好自己個仔，先好接job開班

讀者投稿@梁