#ParentLicenses1912

我已表明唔想再生，同老公解釋咗一輪，佢又唔明，唔知點解釋好

我哋有個半歲嘅仔，阿仔出世之前，老公已經話好想追多個女湊個「好」字

明嘅，好多爸爸都想要個「前世情人」，但有個最主要嘅問題，就係我同老公份糧加埋都淨係足夠養到一個小朋友

而比較其次嘅，可能因為我係獨生女，知道獨生有幾好，以前啲同學好羨慕我可以自己一間房、唔使同人爭玩具同電腦、屋企人唔會偏心等等，所以我偏向生一個

然而，老公對上有兩個阿哥，細個時候成日俾啲阿哥恰，可能因為咁而渴望要家姐細妹，自己未曾擁有過，所以想阿仔有個細妹陪下

而因為我老公有咁嘅想法，以至我比較擔心嘅係我老公擺到明係偏心女仔，我擔心佢太過偏心，令到阿仔覺得爸爸唔鐘意佢

我曾經問過佢：「如果下個係細佬咁點？」

老公：「繼續追女」

我：「我哋份糧只係夠養一個細路」

老公竟然答：「咁咪隊俾老爺奶奶揍囉」

我即刻發火：「第一，你阿爸阿媽就嚟70歲，點解重要繼續辛苦佢哋；第二，明知都冇其他資源去生多個，點解仲要咁不負責任隊自己嘅責任俾人？」

老公：「其實小朋友可以窮有窮養，貴有貴養，阿XX（朋友）得佢一個返工，佢老婆係家庭主婦，加埋兩個女（一個5歲，一個2歲），住套房（叫做大過、個名好聽過劏房少少嘅唐樓單位），咪又係生存到而家。信我啦，細路仔有個伴冇咁悶㗎，開心好多㗎」

唉……我真係唔知點說服佢

讀者投稿@我唔係生仔機器