人性

#ParentLicenses2087

剛剛過完農曆年,發生咗一件關於小朋友利是錢的事!

我係家姐,我同最細個妹感情唔好。我妹十六歲已經生B,今年三十幾歲人重係一事無成,例如欠銀行咭數至破埋產,唔搵工至成日諗住等男人養等等。眼見佢生咗四個小朋友都唔同老豆,現在生到第四個B跟個男人又組織新家庭

我自細自問循規蹈矩孝順父母,但一個搞到自己人生咁亂同唔負責任嘅人就偏偏出現喺自己屋企,不停製造好多麻煩俾屋企!

我妹好要面唔衰得,又周圍曬命住私樓,其實咪又係租嘅,係鬼買咩!係㗎,住公屋嘅我哋佢都少提起,好似怕佢啲朋友睇佢唔起咁,甚早幾年至令阿媽都嬲得滯,除咗佢名

重有,我妹份人真係好假,每隔一段時間就換朋友圈,怕人知佢舊時啲事。今次特登搶咗小朋友個撫養權,等朋友以為佢有份揍小朋友,其實我知佢只係想用外甥個名去申請公屋同津貼!

另外,我妹佢一啲責任感都冇,自己走咗去,而將個小朋友掉底俾我阿媽揍(個小朋友我媽由細揍到大好有感情),其實最辛苦嗰個係我媽,而我阿妹係一蚊都冇拎過返嚟俾我阿媽嘅!

有一日外甥好唔開心問我:「媽咪其實係咪好窮,點解連婆婆儲起俾我嗰萬蚊利是錢都要拎咗去?」我當下俾唔到反應!

大家都知上到中學讀書要用好多錢,我唔知道點解我媽佢老人家會俾佢氹到,話唔識去銀行搞戶口,將咁多年來幫小朋友儲起啲利是錢,俾咗我阿妹去幫我外甥開個戶口儲起。我妹重呃我外甥話開緊戶口未有,農曆新年假期之後到而家個戶口都未有影……

其實外甥都已經好大個,呢啲咁嘅大話點會呃到一個十五歲嘅學生!

然而,上IG就見到我妹佢買新手袋又周圍飲飲食食,問佢嘔返啲錢出嚟就話冇!我火都嚟,同佢嘈咗幾次,點解要搞到小朋友咁唔開心呢😔!

奉勸一句,如果身邊有啲紀錄唔良好嘅兄弟姊妹,無論係小朋友啲利是錢或者涉及其他金錢嘅話,真係要睇緊啲。睇東張西望都大把case可以借鑒,老人家好易心軟俾啲衰女衰仔氹,啲衰人真係會乜都做得出,連老人家嘅棺材本都俾佢食埋!

讀者投稿@嬲到想同個妹斷絕關係的我

error: