#ParentLicenses1780

點解因疏於照顧而令小朋友成為後天SEN，唔係捉父母去勞改，而係捉個細路去做訓練？

話說，認識某人嘅細路患有中度至嚴重程度嘅讀寫障礙，而佢唔識字嘅主因，係因為父母由細到大冇教過佢認字、識字。另外，細路係讀開happy school，學校唔理佢程度發展快慢，亦唔理佢有冇做功課，都會一一批准升班

直到最近，佢父母突然發現自己個仔嘅能力程度真係與同齡差好遠，所以開始迫個細路由幼稚園啲功課開始做返

但好好笑嘅位係，佢哋叫個細路做功課，但就咁扔低細路自己搞掂，自己就走咗去返工，當返到嚟見到個細路冇做就會鬧。細路有講自己睇唔明，所以唔識做，但佢父母從來冇用心聆聽過個細路講，淨係問佢：「點解冇做？點解亂咁做？點解做到錯晒？」

我假期有幫手教個細路做功課，我觀察到佢係聰明同有耐性，例如我話佢寫錯筆劃或者寫得唔靚，叫佢擦過再寫，佢都好有耐性咁改，唔會發脾氣，而且你教佢睇得明條題目，佢係識做

然而，喺佢父母眼中，個細路好似成日走咗去玩、好曳，又唔肯做功課，但老實說，你哋有冇聆聽過個細路嘅說話？佢咪講咗佢唔做係因為睇唔明囉！你哋有冇教過佢呀？定係期望佢boom一聲就會自己識呀？

你唔教佢都算，咁係咪要俾啲解決方法佢？教佢用翻譯筆？教佢查字典？你乜都唔教，佢點樣無中生有會識呀？

我真係好想問，後天SEN嘅人明明係父母唔識教，而搞到個細路有障礙，咁點解唔係捉個父母去做訓練？你俾人幫你去做訓練，但家長自己都唔好好改善自己嘅教育方式，咁有咩用呀？

讀者投稿@義務幫人教仔做功課嘅人