#ParentLicenses1836

我個女K3，近排我思考緊啲問題：我係咪唔識做人媽媽？係咪我無保護自己個女？我同其他父母教法咁唔同，係咪我問題！？

平時去開公園玩，我個女會同另一個同校同班嘅同學「約埋」一齊玩（用A代表呢個小朋友同學，男定女唔講了😂）。話係約埋又其實都唔算約嘅，只係大家去平台公園時間差唔多，有時又咁啱撞正同一個地方學嘢，學完去玩一陣，就係咁啫

平時A見到我同個女，完全無反應，好似唔識咁，我個女都自動識叫人，會講聲「你好」或「早晨」。但呀A呢？就算佢父母出聲叫佢叫人，都無反應，周圍望，但A父和A母，會同佢兜：……
「A心急去玩呀」
「A學完嘢攰呀」
「A想過去抽獎呀」
「A今朝未食早餐呀」
「A肚餓要去食飯先呀」

多到我都唔記得，聽得最多嗰幾句都已經寫咗出嚟

見個小朋友咁樣，我望到都覺得好無禮貌，乜叫聲「呀姨你好」係咁難咩？認真，打個招呼啫，又唔係唔識，而且日日學校門口見到，學嘢時見到，喺平台公園又見到

有日，我喺學嘢間店嘅門口見到A同其父母，我同個女主動同佢哋打招呼

我個女好主動咁：「A，早晨呀」
A望咗我一下，無反應

我：「係咪太早，好眼瞓呀？」
A仍然無反應

A父母：「唉呀，A怕生保同慢熱呀，你知啦」
之後推個A入去學嘢

我個下就諗：我知咩🤔？我咩都唔知💁‍♀️，由K1到依家，怕生保同慢熱係咩玩法？

上到我屋企，自己識拎我個女玩具玩，走過嚟識叫我俾糖佢食，嗰陣又唔見係「生保」？當然，父母全程由佢搞破壞，一唔高興，走去佢父母話我個女唔俾嘢佢玩。大佬，我屋企好細咋，一眼望晒，大家全程睇住，我個女叫大家一齊玩啫，無話唔俾你玩

但呀A父母，叫我個女俾佢玩，唔係佢會唔開心
唔開心？咁我個女好開心？

嗰次A同我個女玩玩下話要畫嘢，畫嘅過程無咩嘅，直至我個女突然講咗句：「錯呀，唔係咁㗎」
A即刻唔開心，走去父母度

小朋友玩，呢啲說話內容，我唔覺得有咩問題，但A父母就好緊張。A父母即同我個女講：「你唔可以話A錯㗎，佢錯咩？你講丫」「嗱，你講唔出，即係無啦，咁你點解話佢錯？」

我即叫我個女過嚟問佢咩事，我個女：「畫心心，叫佢唔好亂油出界」

A父母聽完，仲要補一句：「就算佢係錯，都唔可以直接講，要讚佢其他地方㗎，唔係A會唔開心」

之後我搵咗個藉口話夠鐘要出街，請佢哋離開。自此之後，即使佢哋成日話想上嚟玩，我都一一拒絕

我唔係想話A無禮貌，我亦唔係因畫畫之事去指責個細路，反而透過成件事係睇到父母點教——搞到個細路咁玻璃心，邊個做成？唔好下下用藉口包裝A嘅無禮貌同唔錯得

近日，A父母又同我分享件事，以為我會和議，認同佢哋講嘅嘢好啱咁

話說A去學數學嘅地方，佢話數學老師無愛心，成日話佢個細路錯。A繼續指控數學老師俾堆練習佢做，做完先話佢個細路錯

A父母邊說邊俾本練習我睇（我估應該有人問，點解又咁啱會拎本嘢我睇，點解唔學嘢又拎住本嘢出街，事關因為佢哋準備去數學中心興師問罪），話佢個細路邊度有錯！？

我心諗：個數學老師教返你個細路做返啱，你咪見唔到有錯囉。認真，我唔想回應，所以只係是旦講：「喔」「係囉」「哦哦哦」「差唔多啦」「吓話」「哈哈哈」「係咩？」

點知佢哋愈講愈興奮，講到自己救世主咁，以為自己好巴閉。續話會搵人搞個數學老師，等佢識驚，又話要搞到間嘢執粒又盛。愈講愈離譜，唔知以為佢哋有背景

大佬，個導師又唔係老細，你搞到人哋間嘢執粒，轉頭人哋去第二度做啫，你為難緊個老細同其他員工喎。我嗰下係迫住要聽，皆因個女放學咁耐都未出嚟。點知一出就一齊出，去搭小巴又一齊行，佢哋重未講完

A父母繼續話要點安排搵人搞佢，真係嚇死我。我急急步走，拖住個女講其他嘢，分散個女嘅注意力，費事佢聽入耳

佢哋重講，話自己個細路唔鐘意人哋話佢錯，指責個數學老師咁大個人唔識講嘢，同細路仔唔應該咁講嘢。詳細內容係咩？我無問，亦唔想多事，我只係知我個女去親都好開心

公平啲咁講，小朋友要有適當嘅讚許同要明白挫折，要適當地教導返，而唔係下下自己幫個細路兜，搵藉口包住自己細路嘅錯

自己細路一唔開心，錯就一定係人哋？唔好話個老師有冇錯先，因為我唔知件事係點。但用同一標準，你哋都話過我個女，唔通我個女可以俾你指責，而因為你個細路係寶，所以唔錯得㗎？問心，同為家長，你都指責我個女啦，咁你又覺得我會無嘢咩？難道覺得呢個世界係圍住你哋一家轉嘅？

我平時叫我個女要有禮貌叫人等同於係迫佢？若果我話個女做錯咗嘢，就係我唔啱？媽呀，呢個咩世界嚟㗎？小朋友搞到咁，大個除非自己識諗，唔係嘅話，地球真係唔啱佢哋一家住

好彩我個女畢業後升小學與A唔同學校，去學數學嘅地方亦都唔使再見到佢哋，睇佢哋個樣應該大鬧天宮咁款，過一排我先問下數學中心咩事。

後會無期

讀者投稿@唔識保護自己個女既媽媽