#ParentLicenses1936

我老公有位高學歷表姐，育有一對分別三歲同五歲嘅小朋友

我哋通常只係喺家庭聚會時見面，一年幾次。每次見到老公嘅舅父舅母同表姐一對仔女，我都好羨慕佢哋屋企係嗰種有好教養嘅書香世家

今年初，佢表姐一家過咗嚟我老爺奶奶屋企拜年。正當我奶奶興高采烈地遞緊個全盒去佢小朋友度搲銀時，平時儀態萬千嘅表姐就突然一反常態，歇斯底里地尖叫，嗰吓我真係以為佢鬼上身，俾佢嚇到個心離一離

表姐好凶狠地一嘢撥開咗嗰個「極級可疑」嘅全盒，回過神後，由一秒前嘅強悍，突然又變返平時嘅賢淑，然後溫柔地同佢小朋友講：「多謝大姨婆先，但我哋唔鍾意食糖㗎喎，不如我哋一齊祝大姨婆一家身體健康、龍馬精神」

未幾，表姐就開始啟動「專家講座mode」，細心講解小朋友食甜嘢會點影響智力同身高發展；用糖獎勵小朋友又會點影響佢哋嘅價值觀云云……

佢非常感恩大女今年已五歲，但就從未要求過要食糖，甚至對糖、朱古力等零食都亳無興趣。佢重話為咗教一對仔女「唔浪費」同「分享」嘅美德，每年都會同佢哋一齊儲起拜年收到嘅糖果，然後等萬聖節時就派俾班上嘅同學同鄰居嘅小朋友

聽落好似好有道理，又好正向教育咁，但我心裡就總覺得怪怪的

既然你講到糖同毒藥冇分別，為何又教自己仔女派毒藥俾人哋仔女，重要分分鐘係過期添？咁……真係冇問題？

反觀望住自己兩個同樣係三歲同五歲嘅仔，兩條友正同佢老豆好開心咁表演絕技——點樣逐層逐層食晒粒「毒」金莎，而又整唔散粒嘢

究竟我算唔算生仔冇考牌呢？

上星期日，喺老公家庭聚會上我又見到佢表姐。如常，表姐一家好優雅地向所有長輩打招呼，然後再教佢對仔女同我兩個仔happy share隻出奇蛋

表姐大女：「媽咪叫我哋happy sharing，請你哋食朱古力」

我大仔：「多謝，我哋可唔可以一齊玩個玩具？」

表姐大女：「It’s mine, not yours」

我大仔：「咁不如我哋一齊食朱古力吖」

表姐大女：「No，我都唔鍾意食，我媽咪話『this is poison』」

我大仔：「朱古力英文係chocolate至啱呀」

表姐對仔女見同我兩個仔好似唔太啱channel，之後兩幫小朋友都各自各玩。而我大仔接過粒唔知係poison定chocolate嘅物體後，亦好開心咁同細佬食到成咀都係

喺嗰一刻，我唔知好嬲定好笑。嬲嘅位係，除咗呀仔唔識poison呢個英文外，重疑似俾人搵咗笨柒，而作為佢哋媽媽嘅我，當時冇咩可以做到；笑嘅位係，我感恩自己小朋友懂得happy share自己真正喜愛嘅東西，而唔係己所不欲就施於人，呀媽我真係覺得你哋好可愛

同晚我忍唔住同老公分享咗當日同拜年呢兩單嘢，點知就俾佢恥笑我：「我舅母一家出名戇鳩㗎喎，喂你唔係同佢玩認真化」

我：「……?」

老公話細細個去舅母屋企玩，佢同表姐肚餓，舅母就叫工人姐姐煮咗兩碗麵出嚟。老公嗰碗係正常嘅出前一丁，而表姐嗰碗則係滾水浸麵。原因係佢位高學歷舅母話即食麵包味粉會影響兒童發育，所以唔俾自己個女食喎

後來老公嘅表姐升中讀名校，好似話讀書太大壓力搞到暴肥同爆瘡，但老公就話佢幾次放學都喺KFC野生捕獲表姐，次次表姐都瘋狂隊緊炸雞

小朋友漸漸長大，我哋大人亦不知不覺會對佢哋嘅要求愈來愈高。曾幾何時，我都有FF過要培育到我兩個仔好似表姐兩個咁高貴同知書識禮。但無忘初衷，其實小朋友快樂、健康、善良已足夠，做呀媽嘅何苦要迫到佢哋咁作狀至安樂呢？

讀者投稿@平凡老母