#ParentLicenses1757

你俾錢我使，大晒㗎！？

原來而家身為補習老師，地位超級低微，我要同細路呻埋鼻涕囉

我明一個小朋友只係K3嘅年紀，有時喺上梗堂期間，當佢有鼻涕唔識自己處理，我見佢哋有需要時，我都會無所謂，會幫佢哋呻鼻涕

但係，有一日，有個家長送小朋友入去上堂，喺門口嗰陣，個小朋友大大聲同媽媽講：「我流鼻涕」

家長媽媽：「入去叫老師幫你呻啦」

我即刻攞盒紙巾俾個家長媽媽，同佢講：「一係你出面呻咗先？」

家長媽媽即刻好兇咁話：「你同佢搞啦，我俾錢佢嚟你度上堂，你唔使做咩！」

個媽媽推咗個細路入嚟就轉身走咗。我同其他老師互望咗一下，我心感無奈

首先

呀媽媽，你咁嘅態度，我幫你個細路呻鼻涕都呻得心不甘，情不願

第二

你唔好以為俾咗學費就大晒，你係俾學費嚟學嘢，我唔係你書僮

第三

個仔有鼻涕，唔舒服，唔好帶佢嚟上堂啦，去睇下醫生啦，唔該

第四

唔係下下兇我，我就會覺得你巴閉，會敬重你。唔好意思，我唔會囉

第五

人心肉做，你咁對我，我點可以一啲都唔介意，然後全心全意教你小朋友。我同你講我唔介意，你都唔信啦

我唔係想表達我做補習好巴閉，我都係打份工啫。我想話做人要互相尊重對方，唔好下下以為俾錢人，人哋咩都要聽你指令做嘢；人哋一唔滿足你命令，你就起晒槓兇人囉

讀者投稿@無奈人