#ParentLicenses1702

真係唔該你班怪獸家長，唔係人人都鍾意你個細路，唔係隻隻狗都鍾意同你個細路玩，唔好連狗仔唯一能夠放繩玩嘅地方都剝奪！

事情係喺將軍澳南Donki對出狗公園發生，明明當時狗公園內啲狗玩得好開心，無啦啦有兩個小朋友喺狗公園出面尖叫扮狗叫，一路叫一路汪汪汪

我已經即刻嗌咗出去，叫個細路收聲，同埋叫佢唔好對住啲狗咁叫，佢老母就話：「得㗎喇，佢哋唔會㗎」

結果佢老母仲帶住佢兩個細路入嚟，而且對住啲狗不停叫又係咁跑

入邊有隻邊牧（編：即邊境牧羊犬）好熱情咁一嘢撲跌咗佢個細路，雖然佢老母衰唔晒，有講佢小朋友好襟跌，我心諗：「但係你個小朋友唔撚襟咬嘛，你個小朋友咁樣一路跑一路叫，點撚知邊隻狗突然之間真係唔好脾氣或者俾你刺激到？」

彼時，嚇到狗公園內全部啲主人即刻扯住隻狗唔俾啲狗玩，當然包括我自己兩隻狗，不過佢哋本身就唔驚狗但就好驚人，所以當佢兩個細佬入咗嚟之後，我兩隻狗完全係冇得玩??

唔該你哋班怪獸老母用下個腦！

第一：狗公園係俾狗玩，唔係俾你放怪獸
除非你小朋友係隻狗 ，香港俾狗玩嘅地方已經少之又少，連唯一一個咁細嘅公園你都要放埋你個小朋友入嚟跑同叫？你有冇諗過我哋咁多個狗主嘅感受？

第二：咪再俾你啲小朋友對住啲狗又跳又叫又跑，狗嘅慣性、習性係見到有嘢跑就會追。我唔知你個小朋友有幾high，但係狗都會有情緒，都會好撚憎啲好嘈嘅嘢。另外，你話你小朋友好襟跌，唔驚，不如話其實係我好驚你小朋友整親我隻狗？

第三：你話你小朋友唔驚唧，我想知如果隻狗真係咬咗落去，出哂血，你會唔會都係不停叫你個囡摸人哋隻狗？或者都係笑住同人哋講唔緊要？到時真咬親係咪唔使負責任？

其實你入嚟真係唔係問題，咪企埋一邊睇吓邊隻狗仔願意同你玩，問吓邊隻可以摸得，邊隻唔可以摸得係基本禮貌，而唔係下下都放任你自己啲小朋友喺度尖叫同跑

平時喺商場見到你哋啲小朋友叫同埋跑都由你，反個白眼行過就算，但行入嚟狗公園又叫又跑仲要扮狗叫，係其實你小朋友係狗而我誤會咗係人嚟？

躝返出去啦唔該！咁鍾意養狗自己領養返隻啦！

圖片來源@放狗路人
讀者投稿@放狗路人