#ParentLicenses1690

好多人都話父母嘅性格會十分影響子女，本來我覺得未必係真確，但經過今日同呀仔落平台公園玩時遇到嘅事，先發覺呢句說話係真

我帶我兩歲幾嘅仔落去公園放下電、跑下，咁細路仔見到公園有人就好自然行埋去想一齊玩

當時有一個女仔同佢媽媽一齊，個目測初小嘅女仔一見到我仔跑近少少（無掂到佢哋） 就西晒面話：「No No No，行開啦！」

唔講以為個公園係屬於佢?

我怕咗佢，我哋行開咗，再同呀仔話：「姐姐唔想同我哋玩」

跟住佢哋去咗一邊，我都無再為意佢哋做緊咩。呀仔跑下跑下，無意中又去咗個女仔同個電話中間，不過肯定無掂到，因我全程跟實

我一直跟實，已經下意識想拉開我仔，因為知佢哋好唔鍾意人靠近，點知佢個呀媽秒速一嘢就拎起我仔，再隊俾我話：「我哋上緊堂，你可唔可以control你個仔」

大佬呀，公園係open area，鬼知你上緊堂！同埋我呀仔跑到嗰個位一秒都無，你都幾無禮貌，仲要有疫情之下無啦啦抱起人哋個仔！

另外，大家喺公園都可以隨意走動㗎，要上堂又驚有人阻到你，就麻煩你去返私人地方

圖片來源@殺破狼
讀者投稿@Winky