#ParentLicenses1670

又係我羅太，上次投稿後，見大家都覺得係我全家唔啱，我真係百思不得其解

要小朋友一日到黑喺屋企唔跑唔跳，你哋有幾多人可以做到？

我曾經就樓下敲擊聲報過幾次警，同埋只要佢一嘈我就報管理處，當中警察同保安都無話係我哋唔啱。管理處仲有持續跟進，尤其夜更保安姨姨不時主動去樓下單位聽下佢哋仲有冇發出噪音

如果係我哋唔啱，點解會有咁多人幫我哋？

我哋已經減少咗拉枱拉櫈，老公都已經無再喺屋企做運動。但樓下反而變本加厲，只要我個女一跳一跑，佢就比以前更加瘋狂敲打天花，當然我同我老公都唔會忍佢，跳埋一份

樓下衰人除咗打天花還擊之外，仲會對窗口用大聲公或者咪大嗌講粗口，問候晒娘親，叫我哋：「繼續跳，做乜唔跳呀？」嚇到我哋全家都好驚，我唯有再報管理處

但其實管理處每次嘅回覆都係話聽唔到樓下有嘈，令到我都好崩潰

樓下男戶主丁點同理心都無，我哋都已經改善咗啦，點解唔可以包容下我個兩歲B女！？

好彩，故事最後當然係邪不能勝正。我哋近排見樓下無乜動靜，就向樓下保安姨姨八卦下。據聞樓下一家有一晚拉晒喼，唔知係搬走定移民。我希望佢哋以後都唔好再返嚟，等我哋全家過返正常生活

圖片來源@大時代
讀者投稿@羅太