#ParentLicenses1663

近排睇到條片，講述有個小朋友對住個倉鼠籠放聲大喊，父母仲可以喺隔離拍片同接受訪問話逼不得已；又有父母帶埋啲仔女一齊去交隻倉鼠比漁記，其中一個女仔仲要話驚影響到佢返學，真係WTF？

種種事件令我好慶幸自己有一個從小教我要愛惜生命嘅爸爸

我好記得細個養咗幾隻倉鼠，有一日同爸爸一齊拎咗出嚟玩，當時我好驚，唔敢拎上手。爸爸見到我驚惶失措，就拎咗上手，再教我點摸佢哋，仲教埋我點幫佢哋用啲乾洗粉沖涼

可能我始終仲係細個，咩都唔識，令到有一隻咬到我手指流血，我相信好多父母當下會怪責隻倉鼠咬到小朋友，但我爸爸冇，佢一邊幫我處理傷口，一邊解釋俾我知點解佢會咬我，要我明白到：佢哋都有感覺，都會覺得痛，所以要溫柔啲對佢哋

直到啲倉鼠年老，要離開我哋嘅時候，爸爸用個鐵罐，擺咗啲瓜子同木糠陪伴倉鼠，我哋一齊就喺公園埋咗佢

爸爸教識我要尊重生命，養得佢哋就要負責到底，唔係一句話影響到自己就要送佢哋去死，「以生命影響生命」呢一句絕對係每對父母時刻都要以身作則嘅事

父母嘅身教好重要，生仔真係要考牌

圖片來源@Quora
讀者投稿@我愛爸爸