#ParentLicenses1635

話說本人個女讀K1，最近識咗一班同學仔媽咪，相處融洽，大家都啱嘴型，傾到偈，我哋都經常相約一齊玩，過程中就開始體會到其中一位媽咪係一位「慈母」

點解要咁講？唔係話做該慈母唔好，但只係疑惑，如果佢繼續咁樣教佢個小朋友，會唔會真係「慈母多敗兒」？

慈母有同我哋講佢小朋友嘅行為，特別提到佢小朋友好鍾意爭做第一，不論排隊打尖，搶答問題，甚至會推撞同學，而我自己亦親眼目睹個小朋友係好鍾意搶人玩具，當另一位小朋友已經坐定定，佢都會推開人哋爭坐張櫈，而且仲識得講大話去推卸責任

我明白小朋友相處係會存在磨擦，亦都係佢哋嘅成長過程，然而我覺得個問題係每當慈母目睹整個過程，係完全冇打算制止，亦都會將佢小朋友搶嘢嘅行為講到好合理化

慈母：「三歲嘅小朋友係咁，佢哋個大腦影響到佢哋個判斷力」

我：「?」

慈母會不停講一啲說話，嘗試說服我哋覺得佢個小朋友係冇問題

有一次同佢上興趣班嘅時候，佢個小朋友打同學仔，我哋同返慈母講，慈母：「等我今晚問一問佢當時個情況先」

以佢咁講，又真係將佢小朋友打人合理化咗，所以佢小朋友三歲就已經識得推卸責任。呢個問題都歸咎係媽咪責任，因為每當小朋友做錯事，慈母都會循循善誘咁樣去問，去包庇，灌輸「打人唔係你嘅錯」

我持續觀察，慢慢發現原來呢位慈母亦唔知自己小朋友個問題喺邊，將佢個女呢啲壞嘅行為推卸咗落學校，因為慈母亦同我哋講過，佢小朋友返咗學之後，就係經常性咁，結論覺得係喺學校學返嚟

圖片來源@香港網絡大典
讀者投稿@Mrs leung