#ParentLicenses1374

事情於收工時間，喺新都會近某日本牌子嘅舖頭旁入口發生

入口為一度雙玻璃門，有一對母子行喺我前面，小朋友目測約10歲左右

喺慢行入商場時，哩個小朋友唔知做咩定係玩，想用佢自己隻左腳擋住左邊門唔比佢閂埋，但又因為腳唔夠長，就跟咗個怪獸老母行右邊

其實到哩一刻都仲好正常

後面嘅我見佢哋行咗去右邊道門，我自然就行去左邊門推開，但點估到哩個小朋友突然跳嚟左邊門

我見到佢跳過嚟，都已經即刻冇再推門，同佢哋講咗聲sorry

怪獸老母即時大聲夾惡講：「有無攪錯，明知小朋友喺度都推門」

首先，我冇諗過你個仔行緊右邊會跳嚟左邊；其次，係你個仔跳嚟跳去，自己冇睇住仲要話人，會唔會有啲唔make sense？？

之後我就問怪獸老母：「點解你唔叫你個仔唔好跳嚟跳去而喺度怪人？再加上你視線一直望前都冇理過個仔，佢撞倒就唔好怪人」

怪獸老母keep住高聲喺門口大叫大嚷，又話我黑心；個仔仲學埋個怪獸老母話：「係你推門撞我，你唔啱，你唔好走」

為咗唔好喺街度對罵，我無理佢哋就走，任由佢喺後面叫

正當我搵到我要嘅嘢，諗住去畀錢之際，個怪獸老母拖住個喊緊嘅仔行到我面前

怪獸老母大聲高叫，指住我：「你要同我個仔道歉，你而家攪到佢喊」

我：「其實你個仔喊就唔關我事嘅，佢行路正經就唔會發生哩件事。同埋，佢喊會唔會係因為你嚇親佢？」

怪獸老母：「你要同佢道歉」

我：「其實佢正經行路，唔跳嚟跳去就唔會撞倒，你又照顧好佢嘅話，根本唔會發生。如果咁受保護，就唔好帶個仔出街」

怪獸老母就一枝箭唔知行去邊，我就冇理佢哋走咗

其實好多小朋友都好鍾意邊行邊跳，有啲父母都會同佢哋講邊行邊跳有咩唔好，同埋會解釋點解唔好咁做

但就正正哩啲人唔教好就怪人，你小朋友整到就唔好怪人同喺條街叫啦！你自己都有責任！

讀者投稿@比人話黑心既人