#ParentLicenses1547

近期見好多單親家庭嘅故事，而我嘅故事嚟講，我生長於一個雖然雙親健在，但不如不在嘅家庭

世界上有好多父母淨係做完步驟，意外大肚就生落嚟，完全冇考慮個小朋友

我老豆老母都係，未婚懷孕6個月，大住肚去結婚，我未到一歲就離婚

喺我老豆口中，我老母又煙又酒，夜夜浦酒吧到天光，到處認親認戚；喺我老母口中，我老豆又懶又蠱惑，淨係掛住搵快錢，口花花懶誇張

真係唔知當初佢喺係點一齊🤷‍♀️

喺我記憶中，老豆老母都有照顧過我一段時間。我老豆湊我仲正正常常，會接我幼稚園放學，想要玩具唔太貴都會有，俾爺爺鬧可以喺佢懷抱度撒嬌。後面佢都另組家庭，有個細我一輪嘅妹

起碼喺嗰段時候，我尚算係一個小朋友

老母湊就大獲啦。佢日日自己浦吧飲酒，又嫌我煩，得閒又鬧一餐，唔得閒又鬧一餐；又叫我幫佢拎錢，拎完又鬧一餐。鬧得多又鍾意叫我躝，我自然唔親佢

故事往後同之前某一篇投稿雷同，佢個妹（即係我阿姨）個女出世，老母特登請幾個月假幫呀姨湊

然而，觀察我阿姨後來對老母嘅態度，我估幫佢湊唔掂都算事小，唔搗亂都好似謝天謝地

老母好鍾意我表妹，好似親生一樣。如果唔係我真係見阿姨大住個肚，我嚴重懷疑係佢自己親生個妹畀我

老母以前最多鬧我一餐就算，個表妹出世後，老母竟然當我係工人妹妹，要幫阿姨湊埋佢個女

個表妹又似大人一樣直呼我全稱，睇嚟家庭地位最低好似係我。好彩阿姨知道後，糾正佢係叫姐姐

經歷做「工人妹妹」一段時間後，到我做中學雞，工人妹妹都要讀書啦

唔幫老母買酒買煙又喺度發脾氣，講咩「反叛啦」「知唔知有好多男人鐘意我，你蝦我會有成班人報復你」

係啦，知道你娘娘有兵啦，你點解唔叫佢哋買酒畀你阿笨？我後來拒絕老母越來越多，佢就自己都收聲啦

不過飲醉後都同以前一鳩樣，有事冇事都鬧一餐，算數

過多幾年後，突然叮一聲覺得佢對我付出好多，更對我態度正常好多

係啦，又係同其他故事一樣，一切都係套路。老母：「哎呀～阿媽照顧你，從細到大好辛苦，你到時候出身我就唔做啦，記得俾錢我養老啦」

我：？？？，阿嬸你思覺失調好緊要，我幫你排青山啦

後來我有男朋友，老母日日喺度問幾時生，好俾佢湊

我就講：「表妹有可能快啲」

老母又講：「表妹個小朋友係阿姨嘅，又唔係我嘅，都係自己嘅女生嘅親少少」

我：你唔係當表妹先係你個女咩？反正我都唔會生，你慢慢恨個孫出嚟啦

到我出嚟做嘢，講真搵得唔多，淨係俾少少佢，佢又嘈，我就同佢講：「係啦，你個女就係垃圾嚟啦，搵得少，你忍下啦」

再過一段時日，老母就上咗大陸住，我份少少家用起碼都夠佢用

我都唔明，明明呢個世界上，父母最容易獲得嘅，應該就係自己子女嘅原諒，但係佢哋連「對唔住」都唔會講，甚至唔覺得自己做嘅所有行為有錯，錯嘅只會係小朋友唔理解佢哋辛苦，永遠撻你一句「你有日就明」

其實小朋友感覺好直接，邊個對佢好係有感覺，唔係大人一句就完。對小朋友，連親情的愛都唔俾，仲希望有回報。想要投資有回報，都要落本錢去做啦

讀者投稿@雙親健在的孤兒