#ParentLicenses1516

我係一個單親媽媽，想問下大家

我喺出面做嘢，咁辛苦養大個女，佢大個之後不單止冇盡孝道，而且顧住自己使、吃喝玩樂，連自己阿媽有難都唔幫助，你話係咪生錯咗佢？

我自認自己以前顧住做嘢，將佢寄託喺婆婆度照顧，缺乏溝通同關懷，只係掛住佢食得飽唔飽、著得暖唔暖，但原來咁樣係唔夠！

個女23歲結婚之後就唔做嘢，直至而家40歲都係咁樣，佢冇生小朋友。而女婿搵幾錢我就唔知，只係知佢哋住公屋，養緊幾隻貓

上年知道自己身體有問題，抖唔到氣等等，急症室醫生排期做電腦素描要等一年。因為始終醫生唔知我咩事，喺等待期間佢開唔到藥畀我，就建議我去私家診所照幾張電腦素描，不過要成萬幾蚊，阿女話佢同佢老公都係抆抆緊，只係畀到一千

點知原來佢話要幫幾隻貓供保險，隻貓遲啲要做手術又要洗幾千蚊，而佢老公啱啱買咗車云云

估唔到，我喺佢心目中連隻貓都不如！

疫情之前，佢有同朋友去法國旅行，每年總要去一兩次旅行先安樂，但從來冇俾過家用。最多係出嚟食飯，有時佢畀少少

我幾年前上公屋，所有裝修同傢俬電器，佢同佢老公一毫子都冇出過，又係話手頭緊，屋企好多維修都未有錢做，但佢哋兩公婆係唔會煮飯，每一餐起碼都要六、七十蚊，個女又大食，我真係覺得好心痛， 唔通佢咁嘅情況要持續到一世？

有啲小事想搵佢幫手，佢寧願顧隻貓都唔顧我，仲叫我賣曬以前啲金器，就有錢去做電腦素描，佢話已經幫無可幫

所以我以前真係唔識教女，從冇好好認真同佢溝通，以為供書教學、餵飽佢就已經足夠。如果有得返轉頭，我都希望教佢要成為一個有用嘅人，對社會貢獻，要努力工作，唔係好似而家咁樣懶懶閒就一世

讀者投稿@媽媽