#ParentLicenses2548

今年我屋企發生咗件好痴線嘅事——奶奶成四十七歲人重要玩生仔

我今年廿七歲，老公大我一年，上年因為有咗而結婚。本身同老公都拍咗好多年拖，所以同老爺奶奶都好夾。雖然諗住儀式上一切從簡，但係佢哋都出錢俾我哋擺酒

因為我同老公喺外面住，喺有咗嘅初期，奶奶都成日一收工就上嚟我哋屋企煮嘢同煲湯俾我，喺嗰陣時都諗住自己真係冇嫁錯人

點知喺我有咗六個月嗰陣，奶奶話佢自己又有咗兩個月，嗰陣時佢已經四十六歲。我第一反應就係，到佢生嘅時候，我個仔已經出咗世，如果佢真係生嘅話啲親戚關係應該點叫好呀？

本身我老公有一個廿三歲嘅妹，十七歲嘅細佬，同埋一個得九歲嘅妹，其實冇必要再生，再加上佢年紀咁大真係唔需要再生吧？

我同佢講不如放棄，佢反而好開心咁講：「有多個陪個孫咪重好，兩個一齊湊仲重好」

我有同老公同埋佢啲細佬妹傾過，佢哋都話個仔係奶奶嘅，決定權喺佢手上。我再勸過佢幾次之後，奶奶對我嘅態度即刻變晒，當正我仇人咁，對我不聞不問

我生完之後，奶奶一句都冇同我講過，亦冇探過我。佢曾經話幫我坐月，我生完之後，佢話自己大緊肚唔方便，最後係我阿媽嚟陪月

因為我胎位唔正一定要開刀生，到奶奶生完之後就即刻喺ig post大字story話自己四十七歲重可以順產真係好勁，擺明串我。之後同老公講，老公重話我諗多咗

因為我同老公都要返工，之前奶奶話會幫我湊而家走數不單止，搞到而家多數都係我阿媽上嚟湊孫。有一次我阿媽唔得閒，我想交低個仔俾奶奶睇住，點知奶奶同我講個仔係我嘅叫我自己搞掂佢，最後都係我阿爸捱義氣請假幫我湊仔

其實奶奶喺生完之後已經冇再返工，佢而家已經全職湊仔，有時候佢ig重成日post埋晒去邊度食嘢去邊度玩嘅相，證明佢根本好得閒

本身以為嫁到去個好屋企，點知生完仔之後一切都變晒，而家就好後悔生仔，好後悔嫁咗入嚟

讀者投稿@奶奶學人玩生仔