#ParentLicenses2547

唔知大家記唔記得，有件事導致好多人「炒車」

早排有張相係一隻瘦弱嘅狗企喺露台，令外人以為係主人虐畜。後來主人澄清話隻狗年紀大亦有腫瘤，某部分內臟已被切除，病患導致佢吸收唔到營養，而且表示好愛佢

講返正題，點解我會提起上述事件？人就係一種鍾意主觀分析任何事物再加意見同批評嘅生物。早排有個朋友俾咗張相我睇，佢覺得相中人好似我。張相喺某媽媽群組流傳，相入面係影住我孭住仔仔，我哋戴晒口罩，仔仔貼埋退熱貼

對方加咗句評語：「發燒就咪鬼出街，呢啲阿媽真係累街坊」然後下低嘅留言就係冇公德心之類嘅說話

我係一名打兩份工嘅單親媽媽，我同仔仔住。喺返工嘅日子，仔仔就係依靠社區保姆幫忙湊。但我唔係想喺度賣慘，亦唔係想講我幾咁偉大

被影呢張相嘅當日，我請咗假去照顧發燒嘅仔仔，當時係孭住佢喺商場買嘢補給屋企物資，就係咁簡單。我都想學會「唔好理人點講」、「唔使聽啲無謂說話」，但現實被人無啦啦插咗幾刀重要擺上網，其實係好難受

希望該媽媽群組嘅po主見到，亦希望大家唔好用自己所謂嘅直覺去主觀分析事件，多謝

圖片來源@LINDAJOH
讀者投稿@單親媽