#ParentLicenses1576

適逢週末，同我小朋友去商場行吓街，打算買聖誕禮物

當入到一間舖頭時，聽到有個小朋友一直發出怪聲，我估計應該係妥瑞症小朋友

由於小朋友叫得大聲同頻密，難免引嚟其他顧客嘅眼光，但可以肯定當時係無人講難聽説話或有人取笑佢嘅

小朋友媽媽見到有其他人望多兩眼，就面露不悦咁大聲同個小朋友講：「你自己控制下先啦！唔係又俾人歧視你㗎啦！」

然後我見佢影咗陣相，就拉住小朋友走咗了

作為一個同樣擁有特殊需要嘅小朋友家長，聽到佢咁指責小朋友後，我個心好唔舒服

首先，我好明白小朋友有妥瑞症的話，小朋友係會不由自主地發出聲音，佢自己都唔想亦控制唔到

第二，如果知道小朋友身處有壓力嘅環境（當時人好多）或心情太興奮，徵狀會更明顯嘅，作為家長應該係諗點幫小朋友冷靜返，而唔係叫佢自己「控制下」

最後，好清楚作為SEN孩兒嘅家長要承受嗰種壓力，會長期under奇異目光，亦唔可以要求旁人去理解你，但都唔好喺大庭廣眾將壓力遷移落小朋友，佢先係最受委屈嗰個！

做人父母，生佢出嚟嘅第一願望係想佢健康快樂成長，既然無法控制到佢健康，我哋就一齊努力畀多啲快樂佢??????

文末，我想同小朋友講聲「對唔住」，我諗當時人哋望你只係出於好奇，並唔係一心要歧視你??????

讀者投稿@炸両媽媽