#ParentLicenses1506

我係從事醫療行業，公司其中一個服務係簽證體檢。呢一年嘅booking日日都好full，做到唔停手，基本上都無quota留俾walk in客人

話說，今日有一家五口上嚟，佢哋並無打電話嚟做booking或者經網上做booking，就咁walk in問體檢價錢。佢哋一家有部BB車擋住咗兩個櫃位，故此我哋請佢先生先搵個位置坐低，著佢哋只需要一個家長查詢就可以啦，然而個太太就話：「先生要一齊聽，唔會阻好耐」

咁好啦，我哋答咗價錢後，嗰位媽媽反應好大：「嘩，咁貴嘅！搶錢呀？！」

同事：「我哋係官方授權嘅診所，你嘅體檢結果除咗正本俾你之外，我哋會直接send返畀領事館作跟進，價錢係公價」

激動媽媽：「我哋5個咪成萬蚊，租到個單位住囉」

同事：「唔好意思呀太太，你可以睇下個費用包啲咩……（解釋中）」

激動媽媽：「我見出面嗰啲幾百蚊咋喎，你哋係咪呃人呀！？」

我見同事好似唔係好hold到佢，俾佢食住，於是我出聲

我：「我哋係該國嘅領事館授權嘅體檢診所，你喺出面做嗰啲領事館唔認可，你要重做㗎，你可以上網fact check下先。唔好意思呀，使唔使幫你而家預約定做體檢？因為後面好多已預約嘅客人等梗」

激動媽媽：「咁我唔係客呀？！我又冇阻住佢哋」

當時佢老公、兩個小朋友、架BB車擋晒條路，啲人攝唔到去另一個櫃位

我：「唔好意思呀，不如請爸爸同小朋友同BB去隔離坐下先，我哋再慢慢解答你吖」

佢哋依然死都唔肯讓個位出嚟，又企喺度唔係body check，完全唔知做乜！好彩有位高大嘅客人幫手叫佢哋讓位，又話佢全家7個人加埋兩隻狗仲貴呀，想移民預咗要使錢，叫嗰位太太唔好嬲，嚇親BB

個呀媽先死死地氣讓返個位俾其他人，跟住佢就坐咗喺啲櫈度，成粒鐘同佢老公商量唔知咩，真係當哩度係麥當勞咁。而最煩係，佢哋完全無理到啲仔女，由佢哋兩個跑嚟跑去，仲差啲撞到人

對住咁嘅父母，我戥佢哋啲仔女可憐，基本禮貌都唔識！

讀者投稿@生仔要考牌