#ParentLicenses1488

哩個post係讚一位媽媽有考牌，直頭令我同朋友都羨慕佢囡囡有個咁有耐性而理智嘅媽媽

話說幾年前同個朋友去又一城某餐廳食飯，食乜已經唔鬼記得咗，只係記得有半邊係開放式嘅

坐我哋隔離係一位哭喊中嘅囡囡（大約5-7歲，喊嘅聲量絕對係接受到嘅範圍）同佢媽媽兩位

囡囡一路同媽媽講一路喊，同朋友一齊聽聽下，似係小朋友喺學校遇到同同學相處嘅問題

媽媽一路好耐心聽囡囡喊住講，一路都有畀聲音回應，例如「嗯」「係」「明白」哩類字眼

阿囡講到差唔多完，可能講到激動又爆喊

此時媽媽同囡囡講：「我明白你點解唔開心，點解會喊，你喊晒我再同你講好無？」

唔知點解阿囡一聽到媽媽咁講，即時冷靜咗好多，只剩低少少咽嗚聲

媽媽見個囡應該開始聽得入耳，就開始幫佢分析佢而家遇到嘅問題、成因同可以點樣拆解

我同朋友嗰刻直頭O咗咀，一齊講：「哇，哩個係我哋阿媽就好囉」

⋯⋯唔知嗰位媽媽有無聽到呢?

點解咁講？因為我同朋友嘅媽媽都係最叻「情緒勒索」「只有佢啱永遠你錯」嘅代表嚟

童年陰影太多，但出post係想讚哩位媽媽而已，所以不在此冗敘了

希望各位媽媽可以多點聆聽自己小朋友嘅説話，只要做多少少，就已經可以減少好多家庭悲劇㗎喇

讀者投稿@廢中