#ParentLicenses1460

我一向主張小朋友要有自理能力，所以我小朋友由返K1開始到現在佢讀K3，都係佢自己書包自己孭

可能有人質疑我懶，其實只係我唔想小朋友變「媽寶」，到佢大個都唔識照顧自己

但要知道，「應否為小朋友孭書包」這話題真係講極都唔完

由我小朋友讀K1開始，我已經俾人話虐兒，甚至有個同學嘅婆婆直頭話睇唔過眼我咁對個仔

我想問：「我點對佢？叫佢負返自己責任都有錯？難度你咩都幫佢做晒就係對佢好？」

到而家小朋友讀K3，同一質疑又出現

我小朋友見個個家長都幫佢哋嘅仔女孭書包，佢都話好攰，想我幫佢孭一陣云云

我立即拒絕，因為自己的事自己做，到升上小一都要自己孭

跟住唔知邊度彈咗個阿媽出黎，話第時個書包有轆可以喺地下拉

我話：「我一定唔會買哩款書包畀小朋友，喺地下轆完又孭上身，唔係嘛？」

佢話：「到時個書包咁重，你唔幫佢孭，又唔俾佢喺地下拉，你點解要咁對個小朋友？」

我又硬食了一嘢，不過咁，我都睇到另一件事，就係知道點解你小朋友已經K3，都仲要餵飯，幫換衫同著鞋襪；我亦都好期待欣賞你點樣幫小朋友孭書包孭到中學畢業

讀者投稿@Judy