#ParentLicenses1765
我見到咁多投訴奇葩家長嘅post，我都忍唔住要分享一個喺我教學生涯裏面，暫時冇人能及嘅「奇葩」「怪獸」「恐怖」媽媽
首先介紹一下我自己，我本人喺新界區開舞蹈藝術及幼兒學習中心，而我哋中心喺疫情前每年都會舉辦一個海外交流或周年匯演活動
簡單講解一下「嗰位媽媽」同佢個女嘅背景——佢個女由兩歲開始，喺我哋中心上幼兒學前班（2-3歲課程），約兩歲半開始同時加入芭蕾舞班。起初有工人姐姐接送佢個女，一直都正正常常。隨着歲月嘅流逝，工人姐姐離離合合，我哋嘅關係亦開始起了微妙嘅變化
有時放學之後，佢會打電話嚟同我哋講冇人接佢個女，我哋會俾佢留喺中心等，基本上每次一等就係半個鐘以上。其實冇打嚟通知嘅時候，佢個女每次放學都要等幾個字先會有人接
亦曾試過，佢個女上完芭蕾舞班之後要去隔離座上英文班，但係到放學時間，等極都未有人來接，於是等咗幾個字之後，我忍唔住打電話俾「嗰位媽媽」，佢先話趕唔切過嚟，想我幫佢帶佢個女過隔離座上英文。咁啱嗰日又有另一位跳舞老師喺度一齊上堂（其實我哋啲班通常安排係班接班，所以仲有其他班上緊堂），我見到有人教下一班，咁就應承幫「嗰位媽媽」帶佢個女過去上堂
睇到呢度應該有人會話：「你拒絕佢咪得囉！」
其實當佢有需要，而我又幫到忙嘅時候，我都覺得冇問題，本着大家互相幫助，關係熟絡，亦當朋友幫忙嘅心態，我都會盡力幫忙。只係冇諗過，咁樣會令到「嗰位媽媽」當人哋嘅幫忙係老馮，唔幫一次就當你衰人
出事當日發生喺2020年1月份，就係疫情前我哋最後一次舉辦嘅周年匯演
因為我哋去港島區嘅青年廣場演出，所以我都安排咗一架大旅遊巴帶小朋友，同埋所有演出物資過去表演場地。我哋演出嘅時間係下午，所以安排上午9:00左右集合，去到場地仲要準備佈置，音響燈光，set場；小朋友仲要準備換衫、化妝、set頭、綵排、食lunch等等
當日各位家長同小朋友都懷着緊張又興奮嘅心情，早早回來集合，集合時間大約15分鐘便需要出發，旅遊巴亦已在樓下預備好，殊不知「嗰位媽媽」又來了
接電話嘅係另一位老師，其實打電話嚟嗰位係另一位家長，佢同我哋講：「xx媽媽話佢哋遲咗，而家先啱啱出緊門口」
因為集合時間非常繁忙，我都叫打電話黎嘅家長：「請『嗰位媽媽』自行打電話來溝通一陣間交小朋友俾我哋嘅安排」
之後「嗰位媽媽」就自己打嚟：「x老師，我而家出門口，帶緊xx過嚟，麻煩你哋等一等我」
今次我真係幫佢唔到……
第一、我哋中心係喺工商業中心地段，旅遊巴不能停泊太耐
第二、已經約好場地燈光及音響師需要在lunch time前同小朋友夾彩排
第三、其實「嗰位媽媽」佢哋並唔係住喺附近樓上樓下，過嚟係需要搭車，最快都要成半個鐘
第四、其實全部小朋友都喺度等緊，真係冇可能全世界等佢一個，亦都對其他小朋友唔公平
因為以上幾點，所以我今次真係拒絕佢：「xx媽媽，唔好意思，今次真係等唔到xx，因為……（下刪幾百字解釋）」
「嗰位媽媽」怨聲表示：「等一陣都唔得？咁我而家仲使唔使過嚟？定係唔使參加？」
我：「要麻煩媽媽11:00前自行帶xx去青年廣場交俾我哋」（我哋區嘅位置去表演場地，坐巴士大約需要1小時車程，所以就算慢慢行點都會趕得切去到）
「嗰位媽媽」憤怒表示：「11:00前去唔到係咪唔使表演？咁我不如唔使帶佢過去啦？係咪過咗11點就唔會俾佢表演先？」
我都有啲嬲嬲地：「你盡快帶xx過去先，我會盡量安排佢綵排時間」
之後我哋就繼續行程，而最後，佢當然係過咗11點，差唔多成12點先到，咁我都冇佢辦法，仲要當佢個囡特別嘉賓咁，即刻安排同佢私人化妝set頭換衫
故事仲未完㗎……
因為場地劃分時段book場嘅關係，我哋演出完成之後，其實只剩返半小時清場，另外通常啲爸爸媽媽爺爺嫲嫲公公婆婆都鍾意同小朋友着住表現衫時影吓相，所以我哋會喺台上面預備，台下直接放學。由於今次比較趕，只得半個鐘嘅關係，所以司儀老師都特別宣佈：「後台需要清場，唔可以再返入後台換衫」
點知「嗰位媽媽」又來了
今次仲帶埋睇表演時，鄰座嘅一位操非純正廣東話嘅媽媽一齊「勇闖」後台化妝間，不理化妝間嘅姨姨提醒及勸告，同佢哋個女就地換衫離場
其後，「嗰位媽媽」從此就喺我哋嘅世界裏面消失了。而當所有老師知道呢個消息，大家都表示讚好，皆因佢個女都唔係啲乜嘢「小兒科」，但小朋友我就不作評論，我諗大家都應該知道乜嘢叫做「有其母必有其女」
同場加映小插曲
表演當日坐喺「嗰位媽媽」隔離嘅操非純正廣東話嘅媽媽都消失咗，但係消失之前都有打電話俾我哋講：「xx老師，我覺得xx都好似冇咩進步，人哋跳幾隻舞表演，佢都係得一隻，我哋都係唔學住喇」
其實我想講，「操非純正廣東話嘅媽媽」佢個女就真係好乖，同埋佢係同級嘅小朋友入面技巧最好，身段感覺都係跳得最靚。其實個表演我都安排咗兩隻舞俾佢，但可惜佢阿媽係好鍾意同佢個女請假同埋回鄉探親，仲要專揀啲放假時段一請就請一頭半個月假，而呢個表演主要練習時間就喺聖誕節時段，恰好佢個女12月就請咗大半個月假回鄉探親，返到嚟當然咩都唔記得啦。都唔緊要，諗住1月中先表演，打算俾佢1月頭返來練習重溫下，點知喺表演之前一個星期又．請．假
你估呢個世界真係咁多天才兒童咩，又要馬兒好，又要馬兒不吃草！
讀者投稿@跳舞老師唔易做
