#ParentLicenses2408

血緣的聯繫，總是被形容得很玄妙，還牽扯到奇妙的互相關愛。不過，想像是美好的，現實就係殘酷

我媽於今年中過世，享年接近九十歲。我由外地趕回香港奔喪，卻被舅父叫我去出生醫院（在香港的醫院）查清楚，話我應該去搵返「親生父母」？哈，真有趣

我是一個七十後，現已年過五十了。作為家中第二個女兒的我，出生時，我爸在醫院吵鬧，話產房護士告訴他，我媽生咗仔的，點解上到病房，抱咗個女嬰出來？佢一直懷疑有人偷咗佢個仔，扔底個女嬰俾佢喎；我媽是開刀生產，話唔清楚生咗仔定女。我一直認為這是個笑話，因我年幼時，和我姐及一個堂姐係好似樣的

我媽共生了兩女一子，皆為大我一年的姐姐和細我五年的弟弟，而我爸則在十多年前就去世了。家裡一直都很窮，近這二十多年來，娘家的大部分生活費係來自我俾的家用

既然唔係有遺產，而在我咁大嘅年紀還有需要去搵生死未知的「親生父母」嗎？然而舅父都極力勸我，重叫舅母和我約定日子一齊去。得啦，係咪我媽想搵返佢個「親生仔」呀？成班人都是神經病！

我父母是年紀大才湊合成家，個人條件本來就唔好。雖然都極無可能，我都問下係咪我媽以前有外遇，是否我媽懷疑我是佢和別人生的？咁個答案當然係否定啦

家裡對我並無培育，讀書係靠政府和社會上的資助。自中三之後，我爸就一直漫罵和詛咒我，逼迫我輟學去工作養家。讀大學時係住宿舍，加上有兼職工作，自己支付一切開支，沒花家裡分毫

唉，親子鑑定都普及咗好多年啦，我以前問過我媽，只係我媽拒絕，話只是想表達我爸成日講嘢好無稽，才會提當年。最後，我搵咗我姐一齊去做姊妹之間的基因測試。間診所係舅父搵，無選擇到我搵的診所，咁都理解的。之後舅父重親自陪同睇住醫護取樣本，又話以表誠意，「幫」我俾一部分費用。係呀，理所當然咁認定我要出錢出力，自證身份。幾星期後的報告，係壓倒性的大機率，我和我姐係屬同父同母

其實，無論結果係點，整件事根本就係閙劇

我父母唔係潮州或福建人，亦唔係來自甚麼的名門望族，而且我姐患有情緒病，已愈十年沒有工作，弟弟又自細被過度呵護，工作了愈十年了，待人處事都好幼稚，甚至和同輩比，就像有點智障。總而言之，成個娘家都係麻煩人士，就算有「親生仔」都會被嚇窒

我谷鬼氣都唔係單單因為這件事。幾年前開始，娘家搵過唔少無謂的事來煩住我，最明顯又靠害的一件是今年頭發生

當時我媽因腳的舊患入院，另一個舅父就氣急敗壞咁打電話俾我，指責和我媽同住的我姐和弟弟照顧得我媽差，繼而罵我不孝，要我放棄移民，趕回港照顧我媽。我在幾年前已和老公及女兒移民國外，係我靠一個工作機會去申請的，現已快可入籍了。再者，我趕返來重要住隔離酒店，點解一開口就係逼迫我放棄移民呢？明明重有其他的更好選擇吧

兩個舅父都係有仔有女，亦都係好錫個女，擺好多資源和心機培育仔女。其中一個舅父的女兒，事業發展得幾好。我移到民啫，還在外地掙扎緊，又點算係出色？重話係我父母無可能生得出來？用親人的身份，拖我後腿，背後捅刀，點講都洗唔白，令人心寒

一個家庭兩代人都過得一塌糊塗，除了「有毒」的父母姊弟，還多得這種「孝義」的舅父。我已經好合作咁出席喪禮，在香港期間又客氣應對你哋。往後的歲月，就請大家退回成為陌生人吧

圖片來源@九品芝麻官
讀者投稿@唔存在過的衰女