#ParentLicenses2403

某日同屋企人一齊去食壽司郎，當時店員安排我哋坐吧枱位。一行近張吧枱已經聽到有個細路喺度尖叫，望真啲，原來嗰一家人就坐正喺我哋對面嘅卡位，即我哋中間只係隔咗條輸送帶。嗰家人老豆老母坐埋一齊，而個小朋友就同個隨行者坐另一邊

成餐飯個細路不停大嗌再加埋尖叫，一時企起身搞後面張枱嘅食客，一時又搞輸送帶上面嗰啲嘢

成程佢老豆老母坐喺原位，完全無制止小朋友嘅動作，只係識得用把口嗌：「唔好搞啦B！停啦！」

小朋友聽到佢老豆老母叫佢停手就會狂嗌加尖叫，跟住又循環不斷咁搞後面嘅食客、搞部點菜Pad同搞輸送帶上面啲蓋同食物

今次佢老母都有勁大聲呼喝個小朋友：「都叫你唔好搞囉！你停一陣好無啊！？」

當然，佢嘅呼喝亦都係只會搞到個細路狂呼尖叫，中高低聲都叫晒

後尾我忍無可忍，企起身打算叫佢老豆老母控制下佢個小朋友。我企起身嗰下就同個老豆四目交投，跟住佢老豆就好晦氣話：「唉走啦！」

惟最後都要聽個細路嗌多一陣佢哋先走

嗱，我估應該會有父母會彈句「你無小朋友唔會明白」嘅金句出嚟，但我想講嘅係，雖然個細路猛尖叫又騷擾到啲食客嘅行為係唔理想兼且好煩好難頂，但作為父母只識用把口講，但無做任何嘅動作去教小朋友咩叫唔好搞，而且要同小朋友分開坐，小朋友做出唔乖嘅行為都無去控制佢，咁樣應該係未考好個牌？

圖片來源@自由時報
讀者投稿@壽司娘