#ParentLicenses0853

早喺1989年，美國著名心理治療學家Susan Forward就提出「毒親」（toxic parents）嘅概念，主要是指父母利用自己嘅身份，以愛之名，控制或不期然迫使子女跟着自己嘅想法走，達到自我滿足嘅效果

而我外母所期許嘅：係佢自己要成為最幸福嘅人，沒有之一

講少少背景：我太太讀書時期，外父係中港司機叫搵到錢，外母就一直係一個打麻雀、買名牌、唔會顧屋企嘅師奶

外母各方面都唔係一個標青嘅人，冇姿色、冇學歷、老公唔喺身邊、『窮得只有錢』

所以當我太太細個有少少出色，例如考琴、英文拎全級第一，佢就會無所不用其極咁打擊佢嘅自尊，將佢嘅價值數落到一文不值，例如：「唔會有人要你」、「你老公第日一定會同你離婚」、「醜」、「肥到豬咁」、「你咁樣搵到老公都唔會好得去邊」……因為冇人可以叻過我外母

太太前度就被外母不停單打「冇本事」、「冇用」，成為分手其中一條導火線

分手後又係繼續「你睇你咩本事咪搵到咩人一齊囉」，直至同我喺埋一齊

我係同一個屋苑長大，係師奶群口中嘅乖仔、叻仔

公開關係後，我完全冇位被外母中傷之餘，我對我太太嘅好亦都成為佢心中嘅刺

所以佢開始更加變本加厲咁侮辱我太太：

三番四次直接問我：「XXX（全名），其實我真係唔知你鐘意我個女乜嘢。」

三番四次直接問我：「XXX（全名），其實我個女有乜嘢值得你鐘意唧？」

我每次都專登用最肉麻嘅說話去答外母，每次都專登將條刺更深咁插入外母個心度

傷害我嘅女人，係有代價嫁

搬出嚟後，多咗同我父母交集，我太太先發現原來正常家庭係唔會數落自己家人，即使會互相串對方，但原來問你想飲咩湯係咁令人開心

我太太喺我家第一次搵到親情，而外母心入面條刺就越插越深，開始同其他親朋戚友講個女唔理佢，只係顧男家，開始數落我教佢個女唔孝順佢

直至依家，我太太都係零自信，覺得自己唔配咁幸褔，覺得自己嘅事業唔應該上到呢個高位；仍然會因為外母不斷嘅惡言而放上心而喊。我可以做嘅就只有減少佢兩母女嘅接觸，同令我太太更幸福

喺呢個Page睇到好多女孩子分享自己嘅悲慘童年，但我想作為一個悲慘女孩子嘅另一半同大家分享，娶太太入門，就有責任保護佢免受任何傷害

如果你另一半都係受「毒親」所害，唔好諗住「大愛」、「虎毒不吃兒」、「親情」。多聆聽，多了解，放低你部電話，確確切切咁Stand with her

讀者投稿@丈夫