#ParentLicenses0450

今日發生咗件好搞笑嘅事。

大約夜晚6點50分左右，我喺7仔排緊隊俾錢，當時得一個收銀，我前面有四個人，企我前面個男人拎住滿滿一籃嘢，大約三十歲左右。

突然有一對母子入嚟，個仔大概小四小五左右，一入到嚟就大大聲話要雪糕，呀媽就話：「是但啦！快啲啦！遲到㗎啦我哋，xx uncle唔中意等人。」咁呀仔揀好之後呀媽就去排隊。

排咗唔夠一分鐘，啱啱收好一個交錢嘅，呀媽就衝上前，問我前面個男人：「先生，可唔可以俾我俾錢先？小朋友趕住去上堂！」

個男人猶豫咗一下，呀媽見到就有小小黑面，又發功：「小朋友買杯雪糕唔阻你好多時間唧，你買咁多嘢。」

男人： 「唔好意思，我都趕時間。」

個呀媽就死死氣，翻返去我後面繼續排，之後佢就一直喺度大大聲講……
「買咁多嘢都唔肯讓下人，知唔知阻住好多人㗎，阻人發達猶如殺人父母呀。」
「都唔知有乜咁趕時間。」

呢個時候就排到個男人，佢望一望我，見到我手上一包香口膠，就同我講話：「俾你買先。」

咁我就緊係拿拿臨俾錢啦，個呀媽個樣就越來越嬲，喺度睥住個男人，個男人就擰轉面講咗句：「唔好意思，一到七點太陽落山，我就會變人狼，我趕住返屋企費事嚇親你個寶貝仔。」

個𡃁仔聽到之後，望一望錶：「😱 仲有幾分鐘咋喎！」個刻，我見到個呀媽成個頭都係問號，店員同我都忍唔住笑咗出聲😂

讀者投稿@路人甲