#ParentLicenses2178

請問一下大家，如果你哋嘅屋企人係怪獸家長，你哋會點樣相處？但求集思廣益，圍爐取暖

講緊嗰種係過分溺愛小朋友嘅怪獸家長，佢小朋友有自閉症，語言能力比較低，然而過多兩三年要上中學

喺小朋友讀緊幼稚園嘅時候，女方屋企嘅教育係唔會縱容小朋友打人或者發脾氣，當佢每做錯一件事都會教育佢唔可以咁做

但係喺工人口中得知，原來小朋友喺另一邊屋企嘅屋企人係任由俾佢打或者發脾氣，或者喺佢發脾氣之後重會買玩具俾佢嚟氹佢

當時都有帶個小朋友去上一啲針對語言同自閉症嘅課程，不過人哋點教都冇用，因為佢返到屋企就有人寵佢，其實嗰時都知道佢冇得救

我同屋企人都曾經因為佢過分溺愛小朋友而嘈過交，舉個例，我知道佢嘅小朋友冇辦法控制自己，而佢阿媽都懶理，所以我離開房時係會鎖自己房門，然後我親眼見到小朋友自己搵鎖匙嘗試開我房門

我將呢件事反映返俾佢阿媽知嘅時候，佢反話我屈佢小朋友，而且不斷講一大堆難聽過粗口嘅說話，既扭曲事實，又對我人身攻擊

雖然喺事後佢有同我道歉，但同時表明佢對小朋友嘅教育方式係唔會改變。老實講，其實就算而家肯教，都已經教唔到啦。而我都唔想再嗌交，但係嚟緊暑假小朋友又會喺我屋企渡過一段時間，諗起都覺得辛苦

後來，自從佢讀小學之後就好少過嚟我屋企做功課，而家佢過多幾年就升中學，但係佢間唔中過嚟我屋企嘅時候都有啲細個會出現嘅問題而至今未見改善，例如不斷開閂唔同嘅門等等

雖然係超級細微嘅問題，但係我相信其他家長見到自己小朋友做呢啲咁無謂嘅事都會教育佢，反而佢阿媽就偏偏唔當係一回事，只係表露一貫懶理嘅態度，唯有係到我頂唔順叫佢唔好玩門

不過喺我話完佢小朋友之後，又好驚佢阿媽又同我嘈交，好似失去理智嘅潑婦係咁鬧。佢哋真係好難頂！嚟緊重要係悠長暑假，俾着係大家會點做呢？

讀者投稿@白寶