#ParentLicenses2174

親戚有個一歲半嘅女，佢最鍾意用喊同扭計來達到佢嘅目的

幾乎每次見面，都會見到佢個女喊。當一有人唔遷就佢、唔俾嘢佢，佢就放聲大喊，不過係無眼淚嗰隻。所以我直頭掂都唔會掂佢，亦唔會幫人教仔女，因為會被人覺得係你整喊佢

今晚又嚟過，事緣食完飯就食生果，有人擺咗盒曲奇餅喺飯枱。條𡃁妹就開始發功，一直扭一直喊。佢個老母例牌行開，留佢俾工人「處理」，叫佢要食咗生果先俾食餅，個工人幾難做？

因為個女喊到拆天，我即刻就係拎走罐餅，叫佢食完生果先。佢個女怕我，所以都立即收聲，食咗兩舊生果

然而，唔夠一陣，有人拎個餅盒嘅包裝俾佢玩，我就出聲喇：「你哋又叫佢食生果，又搵嘢引佢？」

結果佢又喊過啦，佢阿嫲就走去攞返盒餅，不過唔係收起，而係直情拎一塊出嚟。條𡃁妹係即刻笑，係即刻笑呀！明明上一秒重大喊大叫緊㗎！

「終於都扭到啦佢！」我大叫，佢哋大笑

縱容小朋友係遲早要付出代價，我就買咗大量花生等以後食，但張單就一定係你哋自己找數

讀者投稿@太太