#ParentLicenses2028

大家好，我想分享以下嘅體驗

可能大家睇完之後就會問：「點解你一開始唔出聲？」

我只係覺得對方小朋友重咁細，佢唔知道或者佢都重未有識得揀呢個選擇嘅時候，我認為鬧對方嘅小朋友亦無謂。小朋友係無辜嘅，但作為家長嘅妳其實呢啲看似微不足道嘅行為都已經係身教

事情係咁嘅，喺12月22日下午13:56分左右，我同小朋友喺天水圍+WOO嘉湖商場地下，嗰度係有五部類似搖搖車嘅遊戲

當中四部搖搖車都有小朋友玩緊，而有一部搖搖車無人玩，所以我同小朋友就選擇咗呢款搖搖車。呢部車有兩個獨立位，備有四款音樂，播一款音樂就轉一個圈，而播晒四款音樂就轉四個圈，呢個遊戲花費只係$6

當時我小朋友已經上咗架車玩，當播到第二個音樂尾聲嘅時候，即係轉緊第二個圈準備轉第三個圈，嗰陣時就有個家長喺我後邊跑過嚟，原來佢帶住個啱啱識行識走嘅小朋友，佢勁快手將佢個小朋友放上搖搖車上，安排佢坐咗喺架車上另外一個冇人坐嘅座位

從呢個家長個行為睇嚟應該係老手，其實嗰陣時架車已經係打圈咁郁緊，佢都重要夾硬將佢個小朋友放上架車度玩

及後，嗰位小朋友上咗嚟坐無耐後，當播緊第三首歌嘅時候，從我身後又有幾個小朋友同家長跑過嚟，佢哋應該係想睇重有冇得「黐金糠」？但啲人睇完架車原來係得兩個獨立位之後已經滿座，佢哋又再跑走咗

其實睇到呢個畫面後我都覺得幾無奈，可能我呢一刻先至真係感受到啲人「黐金糠」係咁解，唔講以為真係有米派

直至播完第四首歌，意思即係已經玩完，佢就將個小朋友嗱嗱聲拎起，然後就跑到老遠，將佢個小朋友放喺佢架BB車後推走

無錯，嗰位家長嘅BB車的確離我哋玩嗰個搖搖車係好遠

個體驗我分享到呢度，其實我只係想講，我並唔介意花$6同你一齊分享玩，我亦冇諗住叫你分一半，但其實你想一齊玩嘅話係咪應該要同我講聲？大家小朋友一齊玩我覺得冇所謂，因為小朋友大家玩遊戲開心下我覺得係可以嘅

然而喺呢件事上，已經唔係講緊錢嘅問題，而係禮貌嘅問題

讀者投稿@終於感受到啲人黐金糠嘅感覺