#ParentLicenses2026 #原文直出

想問下 咁樣係唔係針對緊自己個細佬同佢女朋友
1）唔尊重屋企人
細佬30幾歲 有個7歲既仔 識左個離左婚 有個7歲女（撫養權歸前夫）既女人 屋企人初初都接受 好開通 因為自己本身都係離過婚 所以唔覺有咩問題
12年前 自己離婚 話想搬返去住 2老話細佬講屋企仲邊有位 搬返黎住 我就搬走 我算 有能力 自己租樓住 仲會話我返黎屋企食飯點解唔同佢講 等佢可以出街 唔使見到 但佢出街從來冇同屋企人講過
仲要同2老講 就係一直聽你地講 先搞到今日咁 霸左佢個仔咁多年 搞到個仔成日唔聽佢講 唔跟佢
2）比家用大晒
我租樓住 搵35000左右 每個月比6000家用 另外再供2老保險 年年加保額 屋企有咩事要錢 都會比出黎 自己保險 返工洗費 5000再每月留錢交稅 另每月要比未婚妻屋企7000 因為未婚妻有2個細路 外家幫手湊 睇住佢地 等我未婚妻可以安心出去返工 打份文員工 包底應付細路其他開支同外父醫療開支
細佬就23000-25000左右（未計佢女人份糧） 比6000-8000家用 2老要包食 住 水電煤 湊孫 教功課 家頭細務 衣食住行 只要佢地人係屋企 就係房長開冷氣
佢從來唔跟功課 星期日假期就同個女人出去吃喝玩樂 早出晚歸 考試都唔跟 照走左出去 幾乎完全唔理個仔 所有野 2老會搞 佢地湊呀麻 搞唔掂 自然有人會幫 叫佢跟下功課 就話返工要做架 放工返到黎攰家麻 要休息
有比家用返黎架 2老叫比多少少家用 就話冇錢 成日以為搵好多 但又有錢換車 周圍去玩
最近我堅持要返去住 唔租樓 2老開到口 要我返黎住 睇返住頭家 佢地就搬左出去住 但完全冇同2老講聲要搬 個仔點安排 淨係每星期比150個仔返學搭車 另比2000 比2老當係家用兼湊孫 其他野 憑單比錢 補充練習 個d 冇問佢就算買左 都唔會比返錢
3）個女人當2老工人都不如
2年前搬入黎住就當係自己屋企 放工返黎第一時間除鞋去廁所入房閂門 從來唔會叫人 食飯3催4請先慢慢出黎 食完2個就即刻入房 唔好話洗碗 執自己飯碗都唔會執 連自己帶飯個飯盒都要人幫佢放入雪櫃 唔會幫手晾衫收衫 掃地吸下塵
話有煮婦手 唔做得 黎鬧我地話佢唔做野 但佢又識講 媽媽都有煮婦手 但乜都要做晒
4）全世界要就佢個女人
初初個時仲要拎張清單出黎 話個女人有敏感 有咩唔食得 有時2老唔記得 煮左啲佢唔食得既野 就鬧2老仲乜煮呢d 個女人冇野食 佢唔食得既野 個個都冇得食 唔食得澱粉質 小麥 海鮮 肉 但又係出面成日食米線 打邊爐 飲酒
5）當佢細佬個仔係外人
個女人有日趁佢細佬唔係到 走去同2老講 當年細佬細個唔識處理 都唔知個仔係咪佢親生 話唔識教細路 淨係識吃喝玩樂 自己個女都未搞掂 所以唔會理個仔
細佬仲要同個仔講 就算唔係親身 都會照顧佢 唔會唔理佢 但事實完全冇理過佢 連衫褲鞋襪著咩碼都唔知
個女人成日踩個仔 成績邊科唔得 （其實成績係中上 肯聽教）比2老縱壞晒 但又唔會教 講到自己個女有幾叻幾醒咁 （成績唔掂 仲要冇家教）
屋企人話高年班跟唔到咁多功課 搵上門補習 就話冇錢 唔使搵 老鳳我會睇唔過眼會出手幫佢跟 補習錢都慳返
想問下 求其咁講5樣野 仲有好多野未列出 屋企人甚至親戚都睇唔過眼 開聲講 就話人屋企從來冇理過佢 偏心我 個個都針對佢地2個 借問聲 係咪我地個個欠左佢？同住但互當透明都係屋企人唔岩？

讀者投稿@忍夠了

#小編修訂版

想問下大家，我咁樣算唔算係針對緊自己個細佬同佢女朋友？

一、唔尊重屋企人

細佬30幾歲，有個7歲嘅仔，識咗個離咗婚，有個7歲女（撫養權歸前夫）嘅女人

屋企人初初都接受，真心係好開通，而因為自己本身都係離過婚，所以唔覺有咩問題

12年前，我自己因離婚就話想搬返去住，兩老話：「細佬講『屋企重邊有位，搬返嚟住我就搬走』」

我算，我叫做有能力，所以最後自己租樓住，不過都重要會話我返嚟屋企食飯點解唔同佢講，好等佢可以出街唔使見到，然而佢出街就從來都冇同屋企人講過

細佬重要同兩老講：「就係一直聽你哋講先搞到今日咁，霸咗我個仔咁多年，搞到個仔成日唔聽我講、唔跟我」

二、俾家用大晒

我租樓住，搵35000左右，每個月俾6000家用，另外再供兩老保險，年年加保額；屋企有咩事要錢，我都會俾出嚟；自己保險、返工使費5000，再每個月留錢交稅。除此之外，我每月要俾未婚妻屋企7000，因為未婚妻有兩個細路由外家幫手湊。有長輩睇住細路，等我未婚妻可以安心出去返工。我未婚妻打份文員工，包底應付細路其他開支同外父醫療開支

細佬就搵23000-25000左右（未計佢女人份糧），佢俾6000-8000家用兩老，要兩老包食、住、水電煤、湊孫、教功課、家頭細務、衣食住行，而且只要佢哋人喺屋企，就會喺房長開冷氣

細佬從來唔跟佢個仔嘅功課，逢星期日、假期就同個女人出去吃喝玩樂，早出晚歸，甚至乎佢個仔要考試都唔跟，照走咗出去，可以話幾乎完全唔理個仔。所有嘢兩老會搞

「佢哋湊呀嘛，搞唔掂自然有人會幫」

叫佢跟下功課就話：「返工要做㗎，放工返到嚟攰㗎嘛，要休息，有俾家用返嚟㗎」

兩老叫俾多少少家用就話：「冇錢，唔好成日以為搵好多」

口話冇錢，但又有錢換車，有錢周圍去玩

最近我堅持要返去住唔租樓，因兩老開到口要我返嚟住睇返住頭家，細佬佢哋就搬咗出去住，但事前完全冇同兩老講聲要搬，完成冇交代個仔點安排，淨係每星期俾150個仔返學搭車，另外俾2000兩老當係家用兼湊孫，至於其他嘢就憑單實報實銷，反之補充練習個啲冇問佢就算買咗嘅話，佢哋都唔會俾返錢

三、個女人當兩老工人都不如

女人由兩年前搬入嚟住後就當喺自己屋企，放工返嚟第一時間除鞋、去廁所、入房閂門，從來唔會叫人，食飯要人三催四請先慢慢出嚟，食完飯後兩個就即刻入房。唔好話洗碗，執自己飯碗都唔會執，連自己帶飯個飯盒都要人幫佢放入雪櫃，亦唔會幫手晾衫、收衫、掃地、吸下塵

女人話有煮婦手而唔做得，反鬧我哋話佢唔做嘢。話佢又識講，其實媽媽都有煮婦手，但乜都要做晒囉

四、全世界要就佢個女人

初初嗰時重要拎張清單出嚟話個女人有敏感，會有咩唔食得。有時兩老唔記得 煮咗啲佢唔食得嘅嘢，就鬧兩老：「做乜煮呢啲？！」

個女人冇嘢食，佢唔食得嘅嘢，個個都冇得食。話又係唔食得澱粉質、小麥、海鮮、肉，但又成日喺出面食米線、打邊爐、飲酒

五、當細佬個仔係外人

個女人有日趁細佬唔喺度走去同兩老講，話當年細佬細個唔識處理，都唔知個仔係咪親生；又話唔識教細路，淨係識吃喝玩樂。女人再講話自己個女都未搞掂，所以我唔會理個仔

細佬重要同個仔講，就算唔係親生都會照顧佢，唔會唔理佢，但事實係完全冇理過佢，連衫褲鞋襪著咩碼都唔知

而且個女人成日踩個仔，話佢成績邊科唔得（其實成績係中上，而且肯聽教），俾兩老縱壞晒，但女人佢自己又唔會教，講到自己個女有幾叻幾醒咁（其實成績唔掂，重要冇家教）

屋企人話高年班跟唔到咁多功課，想搵上門補習時，佢哋就即時話冇錢，唔使搵。其實就係老奉我會睇唔過眼，會「自然」出手幫佢跟，想補習錢都慳返

求其咁講幾件事都只係冰山一角，重有好多事未列出，屋企人甚至親戚都睇唔過眼而開聲講，就話人屋企從來冇理過我偏心佢，個個都針對佢哋兩個

借問聲，係咪我哋個個欠咗佢？同住但互當透明都係屋企人唔啱？