#ParentLicenses1412

某日嘅下午，我獨自去添置新居嘅嘢，老公稍後先會合我

行去睇窗簾嘅途中，已經見到兩個大約4-5歲嘅男仔喺度追逐尖叫，附近有三個50-60路嘅女人喺附近慢行吹水，咁我冇理佢哋，我繼續睇自己嘢

去到賣窗簾嗰度睇咗一陣，嗰兩個男仔跑到嚟，繼續玩追逐兼興奮尖叫，拉扯啲窗簾布遮住自己玩「伏匿匿」，但係又未見嗰三個女人

佢哋一路穿插，一路用手扯啲布，我就行去另一邊睇布。睇睇下，我感覺到有人揭起我條裙（我果日係著長傘裙），我下意識即刻撳低自己條裙同「嘩！」咗一聲

我稍為定神再望清楚，先知係其中一個男仔（男A）揭起我條裙想匿入去，但我喺男A未匿到入去，我已經撳低返條裙

男A突然喺度喊，我又冇打過佢，只係「嘩」咗一聲，都唔知佢喊乜

未幾，嗰三個女人終於施施然行到嚟，見到男A 對住我喊就走埋嚟，佢哋冇了解過一嘢就問我：「做乜蝦細路？ 」

另一個細路（男B）就同大人講：「條八婆打到佢喊呀！」

冇錯！呢句嘢係出自一個4-5歲嘅細路口中

我梗係即刻解釋：「係男A 揭我條裙，而且我冇打過佢！」

但係嗰三個女人都唔聽人講嘢，係咁一輪咀鬧我「蝦細路」「會冇仔生」「俾雷劈」之類嘅嘢，太多我根本聽唔切

到呢個時候，驚動到職員妹妹到場，隨即叫：「三個太太冷靜啲先」

但係職員妹妹都俾佢哋三個鬧埋一份，我話：「既然係咁，報警叫警察睇CCTV ，睇下我有冇打細路囉」

佢哋一路話報，但係佢又唔行動，剩係得個「鬧」字！

不久，我老公打嚟問我喺邊，我答到一半，其中一個女人拍我部電話落地下，屏幕貼都裂埋

喺果一刻，我承認我冇用，不嬲眼淺嘅我開始喊，因為覺得好委屈，解釋又唔聽，道理佢哋又唔講，又拎相機影我話擺上網，我講電話又拍跌我部電話，咁樣仲點報警？

終於，有個高級啲職員嚟到了解， 而我老公亦都嚟到，嗰三個女人見我老公就即刻想拖埋兩個細路走，我老公即刻叫佢哋唔好走，話要報警

疑似男A嘅婆婆定嫲嫲，就叫男A同我講「對唔住」，想草草了事。拉鋸咗一陣，都係報咗警

喺拉鋸其間，其中一個女人話：「細路仔係咁架啦！」

我想講，唔好用「係咁架啦」就合理化件事再要人哋包容。錯就係錯，包唔包容係另一回事，唔通一句「返工做嘢係咁架啦」就要接受無理嘅剝削？就要包容不公不義？

讀者投稿@係咁架啦