#ParentLicenses1850

曾發生於某大學視光檢查嘅痛苦經歷，希望唔好有下一位受害者

我個小朋友剛剛滿四歲，好多媽媽都話係時候帶佢去驗眼，睇吓佢需唔需要戴眼鏡，所以就約咗某大學嘅視光診所同佢做一個檢查

當時佢話$800可以搵註冊視光師，$400可以搵實習視光師。我選擇咗貴啲嘅兒科註冊視光師

當日一入到去，登記完後，就有一位女士帶我個小朋友用三部儀器檢查眼睛，我小朋友都好合作

之後又有一位男視光師出嚟，佢就帶咗我個仔入房做檢查。未幾，佢話要落藥水放瞳孔，再出去用嗰三部儀器重新檢查

重點來了，在其中一部儀器上，那位視光師不停按着我小朋友的頭，花了很多時間，就突然叫我走過去

視光師：「媽媽你看看他的視神經有問題，指數非常之高，要轉介去看眼科醫生，平時佢有冇頭痛或者嘔？」

我：「沒有呀！」

視光師：「咁細個小朋友都可能唔識講」

我：「沒問題，你給我寫轉介信吧！」

再等了一會，視光師將轉介信和眼底相片俾我，突然再同我講

視光師：「媽媽你現在馬上去急症室吧！」

我：「有那麼緊急嗎？」

視光師：「是的，這個是緊急情況，擔心佢腦裏面有些東西壓着雙眼，所以出現這個不正常指數，你快點去看醫生吧」

我嚇得馬上打電話俾工作中嘅老公，叫佢趕過來私家醫院急症室，然後即時轉介眼科

眼科醫生反跟我說這間某大學是黑店啊！經常做一些冇必要嘅檢查，這麼小的孩子根本不需要做這個檢查，他的眼睛還在發育中，出現以上嘅指數也是正常

我同老公俾佢哋搞到非常之混亂，一個話我小朋友可能腦裏邊可能有個瘤，一個話我小朋友冇事。為咗審慎起見，我哋最終都同醫生講：「不如照樣同佢做一個腦部磁力共振吧」

我小朋友喺做磁力共振當日，因為又要打鹽水豆，又要抽血，已經哭成淚人，最後重因為磁力共振嘅聲音太恐怖而太受驚，重要幾個醫護按他在磁力共振上打鎮定劑先至送到佢入去做磁力共振

及後，我小朋友食完安眠藥嘅副作用，重令佢醒來時不停話好頭暈好頭暈……我哋兩公婆都心痛到不得了

而我哋最嬲嘅係，照完磁力共振出嚟嘅結果係一切正常，咩事都冇！

先唔好講整個過程我哋用咗三、四萬蚊，無啦啦將一個身體健康冇病冇痛嘅小朋友，講到好似患上絕症咁，要佢即刻去急症室睇醫生，知唔知會令到父母有幾擔心？又知唔知小朋友因為咁白白受咗幾多嘅身體同心靈上嘅折磨？

我真係好想知道某大學視光師點解會做一啲眼科醫生認為不必要嘅檢查？根據該視光師所講，我小朋友是做常規檢查，而間中都會有小朋友出現呢啲情況

究竟年中又有幾多個小朋友同我嘅小朋友一樣，因為被佢哋誤導而身心受害？

讀者投稿@難過的媽媽