#ParentLicenses1851

分享今日所見所聞，我搭緊小巴，有媽媽帶着一女一仔上車。當時小巴好少人，三個分開各自坐，媽媽坐我前一排嘅雙人位，兩個小朋友就坐喺左口邊嘅單人位。上車時只有媽媽拍八達通，另外兩個小朋友冇拍
.
佢哋坐定後司機就開車，看似六年班至初中嘅女兒行嚟行去，期間小巴一直行駛緊。首先行去前面搵媽媽，又返轉頭去後面擺書包，再行去前面搵媽媽，接着行去書包攞八達通，又再行去前面拍八達通，最後先返埋位坐定
.
女孩坐定後，司機終於忍唔住出聲：「同學，上車前要準備好八達通，上車就要拍，之後先拍唔啱程序㗎。坐低就唔好再行嚟行去，開緊車仲走來走去好危險」
.
媽媽回應道：「得喇，我會提佢，唔該你」
.
司機再話：「你唔好淨係睇手機，你要望吓啲仔女」
.
而的確個媽媽全程淨係低頭睇手機，連之前個女搵佢講嘢佢都冇答
.
個媽媽沉默咗一陣，續話：「個仔冇帶八達通，我隔一陣幫佢拍多次」
.
態度照舊嘅媽媽講嘢期間仍然都係眼不離機
.
之後兩個都冇再講嘢
.
其實的確見唔少啲媽媽淨係掛住睇手機而唔理仔女，司機應該真係忍唔住先出聲勸下佢
.
我自己早兩日都喺海港城見到個媽媽，一手拖住個女，一手撳手機，跟住望吓旁邊，突然間喺度大叫：「細佬呢？」
.
呢個媽媽隨即就拉住個女跑返轉頭搵
.
生咗仔女就望佢哋多啲，睇少陣電話啦唔該
.
圖片來源：WhatsCap
文章來源：讀者投稿@乘客A