陰影會隨着時間慢慢丟淡嗎?

#ParentLicenses1983

終於輪到我開post啦,喺講吓我嘅經歷前,可以簡言之,我係一個由細到大都喺家庭暴力下環境成長嘅女仔

相信大家都應該對「家庭暴力」呢幾個字唔會陌生,即使我長大成人,呢啲陰影都扎根喺我自己嘅心入邊

由細到大,除咗俾我嘅爸爸打、言語欺凌、經常使用暴力之外,爸爸重成日飲酒,阿媽有陣時都一副愛理不理嘅樣子

另外,我父母本身唔係好識同仔女溝通

好記得有一次我喺度寫寫下作業,我係冇做錯啲乜嘢,我好認真咁樣做緊我嘅功課,我爸爸可以無啦啦喺後邊好大力咁一巴打落你個頭嗰度。我一臉愕然,完全唔知咩事嘅我望住佢

爸爸:「你個頭耷太低」

我心諗:「耷得太低咁你咪同我講囉,咁點解一巴打落嚟呢?」

又好記得細個瞓覺嗰陣,咁我瞓着咗,佢又無啦啦一巴打落嚟我隻腳嗰度。我嗰刻即刻嚇醒咗,我望住佢,佢就話我因為瞓得唔好所以一巴打落去

總言之,當佢想打,就一定有唔同藉口。只要係佢覺得唔開心或者返工俾人串佢,佢就會搵藉口嚟打我

就因為呢個成長環境所致,我變得唔識得同人相處,亦都可能有一部份性格受佢影響,可能我自己有啲行為都變咗好似佢咁,所以搞到我自己喺中學嘅時候就俾人欺凌。我有同我阿媽講,但我阿媽係無動於衷

此外,我亦都有同我阿媽講:「其實你可唔可以同爸爸離婚?」
我阿媽又好似無動於衷咁

我唔知大家有冇經歷過呢個環境,我好想我阿爸阿媽快啲死。講真㗎,我真係好想嗰日快啲死,佢哋真係令到我好唔開心

另外,我試過有一次啱啱入去廁所沖涼,已經係沖緊,爸爸忽然喺廳度話好急,大聲喝我快啲岀嚟。我都已經拿拿臨,拉開浴簾準備着衫,佢就好大力咁開咗廁所門……你哋冇睇錯,真係開咗廁所門。係咪俾佢睇晒?係,俾爸爸睇晒全裸。我嗰刻即刻拉返浴簾遮住自己,喺企缸入面喊。爸爸重不忘叫我快啲,然後媽媽就過嚟幫我閂咗道門,出到嚟重叫我下次沖快啲

更甚有一次試過被閂水喉。爸爸話如果我沖涼超過15分鐘就會關水喉,好彩沖得切,佢真係閂咗水喉

直至到我19歲嗰陣,出嚟社會做嘢,有一次收工係收零晨十二點,爸爸鎖咗屋企嘅門唔俾我入,我撳鐘係冇聲。之後唯有夜麻麻自己一個女仔喺一間m記坐咗成晚

到第二朝返去,我媽媽先話:「你打俾我吖嘛」

我話:「打俾你,你會聽?」

因為係佢哋俾得最大嘅傷害我,搞到我個人好壓抑、好辛苦,好唔明點解我阿媽要俾個女長期咁樣受你老公暴力對待、精神傷害、虐待、虐打?點解重可以咁無動於衷?我亦都曾經問過我阿媽可唔可以同爸爸分開?佢又係無動於衷。

可能佢哋喺上一代以前個成長環境會覺得打吓仔都冇乜所謂,但我同佢哋個諗法唔同,點解一定要郁手郁腳嚟溝通?你話可唔可以放低我爸爸由細到大虐待我呢個陰影呢?我都相信隨着時間會慢慢丟淡

我好想奉勸各位爸爸媽媽,如果你哋要生小朋友,諗吓你哋當初生小朋友嘅初衷同原因係乜嘢,如果諗唔到,真係唔該你哋唔好生小朋友。如果生小朋友係為咗將來要打佢、虐待佢、精神暴力虐待佢,唔該你哋唔好生。亦請你都唔好揀一個長期有飲酒、有暴力傾向,飲大兩杯就鍾意言語傷害人、暴力傷害人、精神傷害人嘅男人做老公。同樣地,你真係好相愛,一定要結婚,唔好生小朋友,唔好要你啲仔女帶着上一代嘅陰影過佢自己嘅一生,害咗個小朋友一世

Sorry,講到一嚿嚿,但仍希望大家明白我講啲乜嘢😭😭😭

圖片來源@台灣FOCUS家庭協會
讀者投稿@123

error: