#ParentLicenses1957

剛剛睇到有米奇樂園投稿就諗起我之前嘅經歷

【延伸閱讀：#ParentLicenses1955 https://parentlicenses.hk/?p=3216】

發生疫情前，我同老公帶4歲嘅外甥女去玩，同小朋友去咗扮公主化妝。呢$2000花費最重點嘅地方，就係巡遊時可以入去欄入面坐，同巡遊公仔們互動

點知開始嗰陣，有兩個媽媽拖住3個小朋友衝入嚟坐

職員就同佢哋講：「要參加咗公主化妝嘅小朋友先可以入」

佢哋就發晒爛渣咁鬧個職員：「我哋自己小朋友都有著卡通衫，小朋友企喺度又攰！點解唔可以俾佢哋入嚟一齊坐？！」

最後職員竟然屈服，俾佢哋入嚟坐。唔緊要嘅，你哋咁樣搲嘢係你哋肉酸啫！

然而，出去同巡遊公仔們互動完返位坐，個個小朋友都亂坐，冇跟返原本個位，咁我小朋友就見位就坐低

佢哋當中位媽媽居然就埋嚟問我小朋友：「做乜坐咗我個仔個位？」

我行埋去同佢解釋：「佢個位都俾人坐咗，大家都是但坐，咁你哋都是但搵個位坐啦」

點知佢去攞張枱攝埋嚟我小朋友隔籬，我完全唔明點解一定要坐返呢度咁執著。佢推張櫈嗰下，我見到佢再推就一定會夾到我小朋友嘅手同腳，我即刻拉開我小朋友問：「你哋有冇搞錯！咁逼都夾硬攝埋嚟，重要唔使理會唔會整親人？」

佢鬧返我轉頭：「咁做乜要坐我個位？」

我好嬲咁話：「原本你係冇位添㗎！個個俾晒錢入嚟，係得你哋冇俾錢，鬧職員夾硬入嚟坐！而家差啲整到人重咁大聲講嘢嘅？」

佢哋3個小朋友掩住耳仔瘋狂擰頭，另一個媽媽就話：「小姐，小朋友喺度㗎！唔該你唔好嚇親佢哋啦！」

如果咁都嚇親佢哋，你哋阿媽鬧職員嗰陣又唔見你哋嚇親？重要一副好威嘅表情咁行入嚟坐？

未幾，職員就過咗嚟調停，咁啱都完場，我就離開冇再理佢哋

但我一直都好後悔當時冇同呢兩位野蠻媽媽講：「其實身教真係好重要！唔係咁樣發爛渣就可以乜都有！重有，整到人係要道歉，唔係鬧返人自己唔讓位俾你！」

讀者投稿@Nil