#ParentLicenses1605

見到有投稿講睇唔到亮燈儀式，我覺得本身樂園咁多人「同度聖誕」，若果唔係企前面嗰班，都好難睇到，不過樂園亮燈儀式時有煙火表演同飄雪儀式，都幾有氣氛吖

不過我投稿唔係賣廣告，而係想呼籲各位玩時玩，唔好罔顧他人

事緣我同屋企人早兩日都去樂園玩，當中包括我對心境不老但年紀有返咁上下嘅父母。我哋本身帶埋我囝囝企埋一邊，諗住一亮燈就拍吓手，講吓Merry Xmas咁😁

當就嚟開始，就遇到一對湊住兩位小朋友嘅父母，對方爸爸俾一位5, 6歲嘅囡囡騎住膊馬，而嗰位媽媽就俾一位3歲左右嘅囡囡騎緊膊馬

初頭，嗰位媽媽走嚟用佢傾側嘅身體挨吓撞吓咁，圖令我爸爸要越移越過。我爸爸媽媽見佢一個女人咁托高個小朋友，就估佢只係太投入，所以就讓啲位俾佢哋

點知喺呢個時候，嗰位爸爸就攝入佢太太側邊。我哋話：「唔該唔好逼吖，我哋呢邊都係唔夠位啦！」但佢哋完全聽唔到咁，望都無望我哋，繼續挨撞過嚟

然後我囝囝見佢哋越撞越埋，就開始驚（囝囝係自閉譜系，但經治療後，喺正常情況下已經可以適應人群），我哋唔想嚇親小朋友就唔再理論，而且佢哋都完全無反應，所以就唯有「讓」咗個位俾佢哋

雖然有呢段小插曲，但我哋都玩得好開心，反正一開始都唔諗住好圓滿咁睇到晒啲表演

不過有樣嘢令我幾感觸，就係喺我哋慢慢攝返出去時，我就無意中見到對方爸爸媽媽竟然望住我哋咬耳仔，然後笑。我哋唔該佢哋唔好再逼埋嚟時，佢哋明明好留心，好投入咁睇住前面，乜都聽唔到咁，但我哋一走，佢哋就咁……令我懷疑佢哋根本係明知而為之

但我感觸唔係因為個位無咗，而係我自己都有小朋友，我都受過唔少好心人幫手，同時亦明白呢一切唔係必然，唔係因為我哋有小朋友就一定要人讓，更唔可以用失禮嘅手段去爭、去搶。呢一代嘅小朋友總被評為太自我，我覺得同家教好有關

希望呢對父母日後能夠明白「身教」比一時之利更重要（而且都仲要都唔算得上真係啲乜嘢着數😅），希望佢哋唔好拉低全港家長質素條curve

Anyway，今年終於有返啲節日氣氛，希望各位聖誕快樂🧑‍🎄

讀者投稿@FM