#ParentLicenses1944

我女讀五年班，其中有位同學生水痘唔知就照返學。因為我女坐佢隔離，跟住我個女兩日後都生水痘，我哋即時冇返學

時至今日冇返學兩個禮拜，睇咗醫生，醫生就話已經過咗傳染期康復咗可以返學，咁我哋今日就帶埋醫生證明返學校

後來得知佢哋個班主任係有咗BB，唔知幾多個月但見肚，平時留意到佢會喺門口度等學生。因為我今日帶個女返學，所以順便同學校講個女已經康復且冇傳染性

誰知個班主任一見到我個女就即刻彈開，好大聲話：「嘩，佢好返未㗎？未好返唔好返學喎！」

我明佢孕婦之所以會咁擔心係好正常，我唯有同佢解釋：「醫生叫可以返學嘅，俾埋醫生證明你睇」

然而佢唔敢接張紙，隨後我俾咗另一位老師睇，個老師睇完就接咗我女入去

直到今日返到屋企，呀女好唔開心，我問咗好耐都唔講，最後佢喊住話老師扔佢作業落地

我以為我聽錯，我叫佢示範一下咩叫扔落地，佢飛咗本作業落地下

我即刻O晒嘴，問佢：「係邊個老師？」

佢話：「係大肚個老師」

我即時反應係好嬲，我問佢：「最後本書邊個執返？」

女話：「班長」

我隨即就whatsapp 班長嘅媽媽，問佢係咪有呢件事。佢媽媽問完佢女之後覆我，話的確係扔我女本作業落地下，因為個班主任話有菌，所以叫班長執返俾我女叫佢唔好交

我真係嬲到震囉，咩老師嚟㗎？有冇常識㗎？大肚大到冇晒理性，竟然扔個學生本作業落地下同叫佢唔好交功課？醫生都話康復可以返學冇傳染性啦，何況我女係水痘咋，唔係肺炎呀！咁驚係咪應該辭職返去安胎呢？

之後我真係打俾學校講件件事俾校長聽，咁樣喺班上面扔學生本作業落地，有冇尊重過人？我女嘅陰影係幾大，佢負唔負責得起？

讀者投稿@痴線大肚婆