#ParentLicenses1933

我小朋友3歲半，疫情下因較少出街所以怕陌生人，見到識嘅人叫佢打招呼，都成日話怕醜唔夠膽叫人

近排見有返啲興趣班上，諗住幫佢報跆拳，一嚟諗住放下佢啲電，二嚟諗住訓練下佢膽量！

呢間跆拳道班容許家長坐喺旁邊觀課，我小朋友始終都重細，佢去到陌生環境再加上見到啲陌生人好驚，想我陪喺佢側邊同佢一齊上

我嘗試問准教練，佢回話第一堂上都明嘅，可以俾我喺側邊陪住佢一齊做啲動作

然而，上上下堂就有個家長話我：「而家唔係親子班，有個教練喺度教，你重喺旁邊同小朋友一齊上？咁樣係會好影響其他小朋友」

其實我明，但我又忍唔住爆返佢：「咁小朋友第一次上，佢驚，我陪住佢有咩問題，而且我問准咗教練話係可以」

我再補充：「我唔陪住小朋友，佢陣間爆喊，其實一樣會影響其他小朋友」

個家長之後就無出聲，但咁樣俾佢話一話，其實我好唔開心，我都想小朋友獨立啲唔好成日痴住媽媽，但一離開小朋友，佢就會話好驚又爆喊，我都唔知可以點算好

我明要狠心啲小朋友先會長大，所以諗住喺呢間試完堂就算，因為有得觀堂，小朋友見到就會好想痴住。我會再另外報啲無得觀課嘅跆拳班，狠心啲等佢見我唔到，希望到時會好啲

讀者投稿@ABC