#ParentLicenses1403

此乃真人真事，令我真係不得不佩服而家啲媽媽

前兩日同朋友去沙灘玩，當時天氣唔太穩定，間唔中落下微微雨，所以個沙灘人唔多，亦因為咁俾我留意到以下一幕

我哋坐梗嘅位置隔唔太遠嘅遮蔭位有兩個家庭，分別係A同B

喺我哋休息聽緊歌期間，隔離嗰個家庭A嘅小朋友突然尖叫，再跑去媽咪度玩，玩玩下突然走咗去前面個家庭B度

未幾，A小朋友嘅手上突然拎住個多拉A夢嘅掘泥工具，然後A小朋友同佢媽咪嘅對話成功引起我哋嘅注意

A媽咪睇到後話：「好靚喎，喺邊度拎㗎，咁叻嘅？」

但A小朋友無講嘢，可能係唔識表達啩

隔咗無幾耐，前面個家庭B個小朋友走過去我哋隔離個家庭A度問

B小朋友：「個掘泥工具好似係我嘅」

A媽咪話：「係我個仔嘅」

話畢，B小朋友就喊住走返去同佢父母講，話A小朋友拎咗佢啲嘢，護子心切嘅B爸爸立即走去搵A媽媽傾

B爸爸：「個多拉A夢掘泥器係我個仔嘅，因為有個位做咗記號」

A媽咪：「小朋友借嚟玩下，唔使咁緊張」

B媽咪應該係聽到哩句，佢就好嬲咁走過嚟講：「『借』唔係咁㗎囉，你係『偷』喎，我仔啱啱喊住同我講，係你話個玩具屬於你個仔！」

不甘示弱嘅A媽媽講咗句我都覺得幾過分嘅說話

A媽咪：「咁大個就讓下BB啦！」

B媽咪都唔輸蝕，走去拎咗A媽媽個電話定唔知銀包

B媽咪：「我而家拎咗你啲嘢，可唔可以話係『借』呀？定係『偷』呀？你個仔細啫，你唔細吖嘛！咁簡單嘅道理都唔識教，正一無家教！」

B媽咪講完後就攞走A小朋友「借」返嚟嘅玩具俾返自己個仔然後走咗

A小朋友俾人攞走咗個玩具大喊，然後A媽媽發晒癲，爆晒粗口，係咁鬧個B媽媽

B爸爸好有中氣咁講咗聲：「收聲啦！死八婆！教個仔做賊仲聲大大，再嘈報警！你個仔咁細唔使坐監，你代佢坐囉！」

之後全場靜晒，A小朋友都唔敢再喊，我哋本來想繼續食花生睇埋後續，但都俾B爸爸嚇咗嚇，驚佢會郁手所以我哋都執嘢走

讀者投稿@anonymous