#ParentLicenses1903

有一日我老公整親隻手去醫院縫咗十幾針，放咗幾日病假，阿女竟然冇關心佢最愛嘅爸爸都算，重隨口講句：「爸爸你咁冇用㗎」

嗰陣係考試前夕，我有鬧佢唔溫書喺度發夢，爸爸覺得可能阿女有壓力鬧情緒就算數

直到近日，阿女要求爸爸買部新手機俾佢，原因係同學仔都係用新手機，有自己嘅電話號碼，可以玩遊戲，可以傾偈

我同爸爸都覺得幾歲人仔唔需要用到手機，佢又唔需要自己放學返屋企，又唔需要自己出去補習買嘢，更加冇可能自己去街，我真係諗唔到理由要出一個手機號碼俾佢。同埋屋企已經有新iPad、舊手機、電腦，要同同學傾偈全部都做到

阿女發晒脾氣：「搵呢個爸爸真係好冇用，少少錢都出唔起」

阿女問我：「日日幫爸爸整飯盒係唔係因為爸爸冇錢？」

我解釋：「爸爸對花生敏感，食嘢要盡量小心」

阿女唔聽解釋，依然係覺得因為爸爸冇錢、冇用

點解個女會變成咁，幾歲人仔下下講錢，我平心靜氣咁同佢了解究竟發生乜嘢事

經我細問下，原來係阿女好朋友同佢分享佢爸爸（係我舊同事）搵唔到錢俾佢媽咪，佢媽咪覺得爸爸好冇用，少家用重早出晚歸，呢啲男人冇用

當我知道之後覺得好心寒、好驚訝同好傷心，點解幾歲人仔會因為朋友仔講幾句變得咁冷漠。由於佢媽咪都係我舊同事，我好快就約佢出嚟食早餐，順道關心一吓究竟佢屋企發生咩事

言談之間佢承認因為老公搵錢少，令佢唔似其他媽媽一樣可以做闊太咁生活，亦承認因為老公經常做嘢而忽略咗佢哋，所以佢覺得就算佢冇呢個老公都一樣可以生活得好好

我有同佢講佢個女覺得爸爸冇用，搞到我個女都覺得佢爸爸都好冇用。佢竟然話「咁幾好啊」、「你都唔使咁委屈」、「如果你覺得我有問題大家可以以後唔講嘢」

佢覺得個女嘅存在係佢嘅籌碼，重話有個女喺手男家唔敢嘈佢，有錢咪煮多個菜，冇錢就最好屋企都唔好返，所有話題講來講去都係錢。可能佢覺得咁樣講好威，但我真係覺得佢好可憐

直到今日，佢繼續喺同學媽媽group放負，佢個女都繼續同我個女分享佢媽媽嘅偉論。為免再影響我個女嘅思想，嚟緊我會轉校，真心唔希望小朋友喺一個畸形嘅思想上成長

讀者投稿@同學媽咪